ആധാർ ബന്ധിപ്പിക്കൽ മാർച്ച്​ 31 വരെ നീട്ടി

ന്യൂഡൽഹി: ആധാർ വിവിധ സേവനങ്ങളുമായി ബന്ധിപ്പിക്കാനുള്ള അവസാന തീയതി മാർച്ച്​ 31 വരെ നീട്ടി സുപ്രീംകോടതിയു​െട ഇടക്കാല ഉത്തരവ്​.  ബാങ്ക്​ അക്കൗണ്ടുകളുമായി ആധാർ ബന്ധിപ്പിക്കുന്നതിനുള്ള തീയതി കഴിഞ്ഞ ദിവസം ദീർഘിപ്പിച്ചിരുന്നു. ഇതിന്​ പിന്നാലെയാണ്​ മറ്റ്​ സേവനങ്ങളും ആധാറുമായി ബന്ധിപ്പിക്കുന്നതിനുള്ള തീയതി നീട്ടിയിരിക്കുന്നത്​. ഫോൺ നമ്പറുമായി ആധാർ ബന്ധിപ്പിക്കുന്നതിന്​ നേര​ത്തെ ഫെബ്രുവരി ആറുവരെ സമയമനുവദിച്ചിരുന്നു. ഇതും മാർച്ച്​ 31 വരെ നീട്ടിയിട്ടുണ്ട്​. 

അതേസമയം, സർക്കാർ സേവനങ്ങൾക്ക്​ ആധാർ നിർബന്ധമാക്കുന്നത്​ സ്​റ്റേ ചെയ്യണമെന്ന ആവശ്യം സുപ്രീം കോടതി നിരാകരിച്ചു. ബാങ്ക്​ അക്കൗണ്ട്​ തുടങ്ങുന്നതിന്​ ആധാർ ഇല്ലെങ്കൽ ആധാർ എൻറോൾമ​​െൻറ്​ സ്​ലിപ്പ്​ നമ്പർ നൽകിയാൽ മതി. പാൻ കാർഡ്​, മൊബൈൽ നമ്പർ എന്നിവ എടുക്കുന്നതിനും ആധാർ നിർബന്ധമായിരിക്കില്ല. ഇവയും മാർച്ച്​ 31നുള്ളിൽ ആധാറുമായി ബന്ധിപ്പിച്ചാൽ മതി. 

ജനുവരി 10 മുതൽ കേസിൽ അന്തിമ വാദം ആരംഭിക്കും. മാർച്ച്​ 31നുള്ളിൽ അന്തിമ വിധി വരും. ആധാർ വിവിധ പദ്ധതികളുമായി ബന്ധിപ്പിക്കുന്നത്​ ചോദ്യം ചെയ്​ത്​ കൊണ്ട്​ സമർപ്പിച്ച ഹരജികളാണ്​ ​ സുപ്രീംകോടതി അഞ്ചംഗ ഭരണണഘടന ബെഞ്ച്​ പരിഗണിച്ചത്​.