ഗാസിയാബാദിലെ കെ.എഫ്.സി ഔട്ട്ലറ്റിൽ അതിക്രമിച്ചു കയറിയ സംഘപരിവാർ അനുഭാവികളായ അക്രമി സംഘം വെജിറ്റേറിയൻ ബോർഡ് വെപ്പിച്ചു

ഗാസിയാബാദ്: കെ.എഫ്.സി ഔട്ട്ലറ്റിൽ അതിക്രമം നടത്തിയ സംഘപരിവാർ അനുഭാവികളായ അക്രമിസംഘം നടത്തിപ്പുകാരെക്കൊണ്ട് വെജിറ്റേറിയൻ ബോർഡ് വെപ്പിച്ചു. മറ്റൊരു ഹോട്ടലിലും അതിക്രമം നടത്തി. ഇരപതിയഞ്ചോളം ക്രിമിനൽ കേസുകളിൽ പ്രതിയായ നേതാവ് നയിച്ച പത്തംഗ സംഘമാണ് കെ.എഫ്.സിയിലും നസീർ ഹോട്ടലിലും അതിക്രമം നടത്തിയത്.

കൻവാർ യാത്ര നടക്കുന്നതി​​ന്റെ ഭാഗമായാണ് ഗവൺമെന്റ് നിർദ്ദേശങ്ങളൊന്നുമില്ലാതിരിക്കെ അക്രമിസംഘം തന്നിഷ്ടപ്രകാരം ഫുഡ് പൊലീസിങ് നടപ്പാക്കിയത്. സംഭവത്തിൽ പൊലീസ് കേസെടുത്തെങ്കിലും ​ആരെയും അറസ്റ്റ് ചെയ്തിട്ടില്ല. വസുന്ധരാ നഗറിലുള്ള കെന്റക്കി ഫ്രൈഡ് ചിക്കൻ ഔട്ട്​ലെറ്റിലും നഗരത്തി​ലെ പ്രശസ്തമായ നസീർ ഹോട്ടിലുമാണ് അക്രമി സംഘം ഭീഷണിപ്പെടുത്തി ‘വെജിറ്റേറിയൻ മാത്രം’ എന്ന ബോർഡ് വെപ്പിച്ചത്.

രാവിലെ അക്രമമുണ്ടായപ്പോൾ ഔട്ട്ലെറ്റ് അടച്ചിട്ടു. വൈകീട്ട് നാലുമണിയോടെ തുറന്ന​പ്പോഴാണ് ‘വെജിറ്റേറിയൻ മാത്രം’ എന്ന ​ബോർഡ് കെ.എഫ്.സി സ്ഥാപിച്ചത്. ഇത് തങ്ങളുടെ കച്ചവടം ഏതാണ്ട് പൂർണമായും ഇല്ലാതാക്കിയതായി നടത്തിപ്പുകാരനായ പിങ്കി ചൗധരി പറയുന്നു.

കൻവാർ യാ​ത്ര കഴിയുന്നതുവരെ നോൺവെജിറ്റേറിയൻ വിൽക്കാൻ അനുവദിക്കില്ലെന്നും തുറക്കണമെങ്കിൽ വെജിറ്റേറിയൻ ബോർഡ് വെക്കണ​മെന്നുമായിരുന്നു സംഘത്തി​ന്റെ ഭീഷണി. ഹോട്ടലിൽ ചിക്കൻ കഴിക്കാനെത്തിയ പലരും സംഭവമറിഞ്ഞത് പിന്നീടാണ്.

നോൺ വെജിറ്റേറിയൻ ഭക്ഷണം മാത്രം കഴിക്കാനാണ് തങ്ങളുടെ ഹോട്ടലിൽ ആളുകളെത്തുന്നതെന്നും ഇതോടെ ഹാട്ടൽ പൂ​​ട്ടേണ്ട അവസ്ഥയിലാണെന്നും നസീർ ഹോട്ടൽ നടത്തിപ്പുകാരനായ മഹേഷ്‍കുമാർ ബാഗേൽ പറയുന്നു.

നൂറോളം പേർ ഇരച്ചുകയറി ഹോട്ടലിലെത്തിയെന്നും അവർ ജീവനക്കാരെയും എല്ലാവരെയും ഭീഷണിപ്പെടുത്തിയതായും അധിക്ഷേപ വാക്കുകൾപറഞ്ഞതായും ബാഗേൽ പറയുന്നു.