മരുന്നും വൈദ്യസഹായവുമായി കഫീൽ ഖാനും സംഘവും ഉൾനാടുകളിലേക്ക്; പ്രാർഥനയും സഹായങ്ങളുമായി കൂടെ നിൽക്കണമെന്ന്​

കോവിഡ്​ വ്യാപനം കുത്തനെ ഉയരുന്നതിനിടെ വൈദ്യ സഹായം നിലച്ച ഉൾനാടുകളിലേക്ക്​ സേവനത്തിന്​ ഇറങ്ങുകയാണ്​​ ഡോ. കഫീൽ ഖാനും സംഘവും. ആശുപത്രികൾ നിറഞ്ഞു കവിഞ്ഞതോടെ ഉൾനാടുകളിലെ ആരോഗ്യ സാഹചര്യങ്ങൾ വിലയിരുത്തുകയും സാധ്യമായ വൈദ്യ സഹായവും മരുന്നുകളും എത്തിച്ചു നൽകുകയുമാണ്​ ലക്ഷ്യമെന്ന്​ ഡോ. കഫീൽ ഖാൻ പറഞ്ഞു.

ഡോ. കഫീൽ ഖാൻ മിഷൻ സ്​മൈൽ ഫൗണ്ടേഷനും ഡോ. ഹർജിത്​ ഭാട്ടിയടക്കമുള്ള ഇന്ത്യൻ പ്രോഗ്രസീവ്​ ഡോക്​ടർ സംഘവും ചേർന്നാണ്​ 'ഡോക്​ടർമാർ നിരത്തുകളിൽ' എന്ന പേരിൽ പദ്ധതി നടപ്പാക്കുന്നത്​. കഫീൽ ഖാനും സംഘവും നഗര പ്രാന്തങ്ങളിലുള്ളവർക്ക്​ മാസ്​ക്​ വിതരണം ചെയ്യുന്നതി​ന്‍റെയും ബോധവത്​കരണം നടത്തുന്നതിന്‍റെയും വിഡിയോയും പങ്കുവെച്ചിട്ടുണ്ട്​.

പൊതു ജനങ്ങളിൽ നിന്ന്​ പണം സമാഹരിച്ചും പരമാവധി ആളുകളെ സഹകരിപ്പിച്ചുമാണ്​ പദ്ധതി നടപ്പാക്കുന്നത്​. ഡോക്​ടർമാരും ആരോഗ്യ പ്രവർത്തകരും പദ്ധതിയിൽ അംഗമാകണമെന്ന്​ ഡോ. കഫീൽ ഖാൻ അഭ്യർഥിച്ചു. പദ്ധതിയിലേക്ക്​ പണം നൽകുന്നവരുടെ പേരും തുകയും വെബ്​ സൈറ്റിൽ പ്രസിദ്ധീകരിക്കുന്നുണ്ട്​.