ഹരിയാനയില്‍ അതിസാരം ബാധിച്ച് ഒമ്പത്​ വയസുകാരന്‍ മരിച്ചു; മുന്നൂറോളം പേര്‍ക്ക് രോഗബാധ

ഛണ്ഡിഗഡ്​: ഹരിയാനയിലെ പഞ്ച്ഗുള ജില്ലയിലെ ഗ്രാമങ്ങളിൽ അതിസാരം പടരുന്നു. അഭയ്പുർ ഗ്രാമത്തിൽ വയറിളക്കം ബാധിച്ച് ഒമ്പത്​ വയസുകാരന്‍ മരിച്ചു. വിവിധ ഗ്രാമങ്ങളിൽ മുന്നൂറോളം പേരെ രോഗം ബാധിച്ചതായാണ്​ കണക്ക്​. നൂറോളം പേര്‍ പൊതുജനാരോഗ്യ ക്യാമ്പുകളിലും പഞ്ച്​ഗുള സിവിൽ ആശുപത്രിയിലും ചികിത്സയിലാണ്​. ഇതിൽ 46 കുട്ടികളു​ം ഉണ്ടെന്നാണ്​ റിപ്പോർട്ട്​.

ഓടയിലെ വെള്ളം കലര്‍ന്ന കുടിവെള്ളം ഉപയോഗിച്ചതാണ്​ രോഗംപടരാൻ കാരണമായതെന്ന്​ സംശയിക്കുന്നു. രോഗം റിപ്പോർട്ട്​ ചെയ്യ​​പ്പെട്ട സ്​ഥലങ്ങളിൽ നിന്ന്​ ​കുടിവെള്ളത്തിന്‍റെ സാമ്പിൾ പരിശോധനക്കായി ശേഖരിച്ചിട്ടുണ്ട്​. ബുധനാഴ്ചയാണ്​ അഭയ്​പുരിൽ അതിസാര ബാധ റിപ്പോർട്ട്​ ചെയ്​തത്​. വ്യാഴാഴ്ചയായതോടെ കേസുകൾ വർധിക്കുകയായിരുന്നു. ഇതേ തുടർന്ന്​ പഞ്ച്​ഗുള ചീഫ്​ മെഡിക്കൽ ഓഫിസർ ഡോ. മുക്​ത കുമാർ അഭയ്​പുരും സമീപ ഗ്രാമങ്ങളും സന്ദർ​ശിച്ചു. അഭയ്​പുരിൽ ശുചിത്വം വളരെ കുറവാണെന്ന്​ കണ്ടെത്തിയതായി ഡോ. മുക്​ത പറഞ്ഞു. പ്രദേശത്തെ അടിസ്ഥാന സൗകര്യങ്ങള്‍ പരിതാപകരമാണ്​. ശുചിത്വത്തില്‍ ഏറെ പിന്നാക്കം നില്‍ക്കുന്ന പ്രദേശമാണിത്​. തുറന്നു കിടക്കുന്ന ഓടയ്ക്ക് സമീപത്താണ് കുടിവെള്ള ടാങ്ക് സ്​ഥാപിച്ചിരിക്കുന്നത്​. വീടുകളിലെ മാലിന്യങ്ങള്‍ ഈ ഓടയിലേക്കാണ് വന്നുചേരുന്നത്. മലിനജലം കുടിവെള്ളത്തില്‍ കലര്‍ന്നതാകും കോളറ വ്യാപനത്തിന് കാരണമായതെന്ന്​ ഡോ. മുക്​ത അഭിപ്രായപ്പെട്ടു.

അതേസമയം, ഡോക്ടര്‍മാരുടെ അശ്രദ്ധയാണ് ഒമ്പത്​ വയസ്സുകാരന്‍റെ മരണത്തിന്​ കാരണമായതെന്ന് ബന്ധുക്കള്‍ ആരോപിച്ചു. ചൊവ്വാഴ്ച രാത്രി ആശുപത്രിയില്‍ പ്രവേശിപ്പിച്ച കുട്ടിയെ പിറ്റേന്നു രാവിലെ തന്നെ ഡിസ്ചാര്‍ജ് ചെയ്​തെന്നും ഉച്ചയോടെ മരിച്ചെന്നുമാണ്​ ബന്ധുക്കൾ പറയുന്നത്​.