പീഡനശ്രമം ചെറുത്ത ബാലികയെ സൈനികൻ ഓടുന്ന ട്രെിയിനിൽനിന്ന്​ വലിച്ചെറിഞ്ഞു

മുംബൈ: ഓടുന്ന ട്രെയിനിൽ പീഡിപ്പിക്കാൻ ശ്രമിച്ചപ്പോൾ ഒച്ചവെച്ച്​ എതിർത്ത എട്ടുവയസ്സുകാരിയെ സൈനികൻ പുറത്തേക്ക്​ വലിച്ചെറിഞ്ഞു. ട്രെയിൻ വേഗത കുറവായതിനാൽ പെൺകുട്ടി​ നിസ്സാര പരിക്കുകളോടെ രക്ഷപ്പെട്ടു. മഹാരാഷ്ട്രയിലെ സതാര ജില്ലയിലെ ലോനന്ദിന് സമീപമാണ്​ ഞെട്ടിക്കുന്ന സംഭവം അരങ്ങേറിയത്​. പ്രതിയായ ഉത്തർപ്രദേശലെ ഝാൻസിയിൽ ജോലിചെയ്യുന്ന സൈനികൻ പ്രഭു മലപ്പ ഉപഹാറിനെ റെയിൽ​െവ പൊലീസ്​ മണിക്കൂറുകൾക്കകം പിടികൂടി.

ഗോവ-നിസാമുദ്ദീൻ എക്സ്പ്രസിൽ ചൊവ്വാഴ്ച പുലർച്ചെയായിരുന്നു സംഭവം. വിമുക്​തഭടനായ അച്ഛന്‍റെയും അമ്മയുടെയും സഹോദരിയുടെയും കൂടെ യാത്ര ചെയ്​ത കുട്ടിയാണ്​ കണ്ണിൽച്ചോരയില്ലാത്ത ക്രൂരതക്ക്​ ഇരയായത്​. ഡൽഹിയിലേക്ക് യാത്ര ചെയ്യുകയായിരുന്നു കുടുംബം.

പുലർച്ചെ നല്ല ഉറക്കത്തിലായിരുന്ന കുട്ടിയെ ഉപഹാർ എടുത്ത് ടോയ്‌ലറ്റിലേക്ക് കൊണ്ടുപോയി പീഡിപ്പിക്കാൻ ശ്രമിക്കുകയായിരുന്നു. ഉറക്കമുണർന്ന കുട്ടി ഒച്ചവെക്കുകയും ശ്രമം ചെറുക്കുകയും ചെ്​യതു. ഇതോടെ ടോയ്‌ലറ്റിൽ നിന്ന് പുറത്ത്​കൊണ്ടുവന്ന്​ ഓടുന്ന ട്രെയിനിൽ നിന്ന് വലിച്ചെറിയുകയായിരുന്നു.

റെയിൽ‌വേ ട്രാക്കിൽ ചോരയിൽ കുളിച്ച നിലയിൽ കണ്ടെത്തിയ കുട്ടിയെ നാട്ടുകാരാണ്​ ആശുപത്രിയിൽ പ്രവേശിപ്പിച്ചത്​. പരിക്കേറ്റ കുട്ടി തന്നെയാണ്​ പീഡനശ്രമത്തെ കുറിച്ച്​ പൊലീസിന്​ വിവരം നൽകിയത്​. തുടർന്ന്​ പ്രതി രക്ഷപ്പെടാതിരിക്കാൻ തൊട്ടടുത്ത സ്​റ്റേഷനുകളിൽനിന്നായി 400 പൊലീസുകാർ ട്രെയിനിൽ കയറി. ഇവർ നടത്തിയ ഉൗർജിത പരിശോധനയിലാണ്​ ഉപഹാറിനെ പിടികൂടിയത്​. അതേസമയം, സംഭവത്തെ കുറിച്ച്​ പൊലീസ്​ അറിയിക്കുന്നത്​ വരെ കുട്ടിയുടെ കുടുംബം അറിഞ്ഞിരുന്നില്ല. മകൾ മുകളിലെ ബെർത്തിൽ ഉറങ്ങുകയാണെന്നൃാണ്​ തങ്ങൾ കരുതിയതെന്ന്​ പിതാവ്​ പൊലീസിനോട്​ പറഞ്ഞു.