20 ദിവസത്തിനിടെ 64 മരണം; ആഗ്രയിലെ ഗ്രാമങ്ങളിൽ കോവിഡ്​ പിടിമുറുക്കുന്നു

ന്യൂഡൽഹി: കോവിഡ്​ രണ്ടാം തരംഗം അതിതീവ്രമായി രാജ്യ​ത്ത്​ തുടരവെ ആഗ്രയിലെ ഗ്രാമങ്ങളിലും രോഗബാധ പടരുന്നു. ആഗ്രയിലെ രണ്ട്​ ഗ്രാമങ്ങളിലായി 64 പേരാണ്​ കഴിഞ്ഞ 20 ദിവസത്തിനിടെ കോവിഡ്​ ബാധിച്ച്​ മരിച്ചത്​. ചികിത്സ സൗകര്യങ്ങളുടെ അപര്യാപ്​തതയും ജനങ്ങൾക്ക്​ കോവിഡിനെ കുറിച്ച്​ അവബോധമില്ലാത്തതും ഇവിടെ വലിയ പ്രതിസന്ധിയാണ്​ സൃഷ്​ടിക്കുന്നത്​.

ആഗ്രയിൽ നിന്ന്​ 12 കിലോ മീറ്റർ അകലെയുള്ള ബാമരുളി കാത്ര ഗ്രാമത്തിൽ 50 പേരാണ്​ കോവിഡ്​ രോഗലക്ഷണങ്ങളോടെ മരിച്ചത്​. പലർക്കും ശ്വസിക്കാൻ ബുദ്ധിമുട്ട്​ അനുഭവപ്പെട്ടിരുന്നു. ആശുപത്രിക്കുള്ള യാത്ര മധ്യയേയാണ്​ പല ആളുകൾക്കും ജീവൻ നഷ്​ടമായത്​. കോവിഡ്​ ലക്ഷണങ്ങളോടെ കൂടുതൽ പേർ മരിച്ചതിനെ തുടർന്ന്​ കഴിഞ്ഞ ദിവസം ആരോഗ്യവകുപ്പ്​ ഇവിടെ പരിശോധന നടത്തി. പക്ഷേ 46 പേർ മാത്രമാണ്​ പരിശോധനക്കെത്തിയത്​. ഇതിൽ നാല്​ പേർക്ക്​ രോഗം സ്ഥിരീകരിക്കുകയും ചെയ്​തു. ഏകദേശം 40,000ത്തോളമാണ്​ ഗ്രാമത്തിലെ ജനസംഖ്യ. തെരഞ്ഞെടുപ്പിന്​ ശേഷമാണ്​ ഗ്രാമത്തിൽ കോവിഡ്​ വ്യാപനം തുടങ്ങിയതെന്നും റിപ്പോർട്ടുണ്ട്​.

ആഗ്രയിൽ നിന്ന്​ 40 കിലോ മീറ്റർ അകലെയുള്ള എമാഡപൂർ ഗ്രാമത്തിലും സ്ഥിതി വിഭിന്നമല്ല. ഇവിടെ 14 പേരാണ്​ പനിയും കോവിഡി​െൻറ മറ്റ്​ ലക്ഷണങ്ങളുമായി മരിച്ചത്​. 100 പേരെ ടെസ്​റ്റ്​ ചെയ്​തതിൽ 27 പേർക്ക്​ രോഗം സ്ഥിരീകരിച്ചു. കൂടുതൽ ആളുകൾ രോഗബാധിതരായതോടെ സമീപത്തെ സ്​കൂൾ ഐസോലേഷൻ സെൻററാക്കി മാറ്റി. പക്ഷേ അടിസ്ഥാന സൗകര്യങ്ങൾ പോലും ഇവിടെയില്ല. രോഗികൾക്ക്​ ശ്വാസതടസം അനുഭവപ്പെട്ടാൽ ഓക്​സിജൻ നൽകുന്ന സംവിധാനവും ഒരുക്കിയിട്ടില്ല. അതേസമയം, ഗ്രാമത്തിലുള്ളവർ കോവിഡ്​ പരിശോധനക്ക്​ മുന്നോട്ട്​ വരാത്തത്​ വലിയ പ്രതിസന്ധിയാവുന്നുണ്ടെന്ന്​ ആരോഗ്യപ്രവർത്തകർ ചൂണ്ടിക്കാട്ടുന്നു.