മൂടൽ മഞ്ഞ്​: യു.പിയിൽ കാർ കനാലിൽ വീണ് ആറ്​ മരണം

നോയി​ഡ: ഉത്തർപ്രദേശിലെ ഗ്രേറ്റർ നോയിഡയിൽ കനത്ത മുടൽ മഞ്ഞിൽ കാഴ്​ച മറഞ്ഞതിനെ തുടർന്ന്​ കാർ കനാലിലേക്ക്​ വീണ് രണ്ട്​ കുട്ടികൾ ഉൾപ്പെടെ​ ആറു പേർ മരിച്ചു. മഹേഷ്​(35), കിഷൻലാൽ(50), നീരേഷ്​(17), റാം ഖിലാഡി(75), മല്ലു(12), നേത്രപാൽ(40) എന്നിവരാണ്​ മരിച്ചത്​. അഞ്ച്​ പേർക്ക്​ പരിക്കേറ്റിട്ടുണ്ട്​.

ഗ്രേറ്റർ നോയിഡയിൽ ഞായറാഴ്​ച രാത്രി 11.30നായിരുന്നു സംഭവം. 11 പേരടങ്ങുന്ന സംഘം യാത്ര ചെയ്​ത മാരുതി എർട്ടിഗയാണ്​ അപകടത്തിൽ പെട്ടത്​. ​ഡൻകോർ മേഖലയിലെ ഖേർലി കനാലിലേക്കാണ്​ കാർ വീണത്​.

അപകടത്തെ തുടർന്ന്​ കാറിലുണ്ടായിരുന്ന 11 പേരെയും ആശുപത്രിയിലെത്തിച്ചെങ്കിലും ആറ്​ പേർ അപ്പോഴേക്കും മരിച്ചിരുന്നു.