പഴയ 500 രൂപക്ക് ഇനി ഉപയോഗം നാമമാത്രം

ന്യൂഡല്‍ഹി: പഴയ 500 രൂപ നോട്ടിന് ഇനി നാമമാത്രമായ ഉപയോഗം മാത്രം. പെട്രോള്‍ പമ്പിലും വിമാന ടിക്കറ്റ് എടുക്കാനുമൊന്നും പഴയ നോട്ട് ഇന്നു മുതല്‍ ചെലവാകില്ല. ദേശീയപാതകളിലെ ടോള്‍ ബൂത്തിലും പഴയ 500 രൂപ അസാധുവായി. വൈദ്യുതിക്കും മറ്റുമുള്ള ബില്ലുകള്‍ അടക്കാനും റെയില്‍വേ ടിക്കറ്റ് എടുക്കാനും സര്‍ക്കാര്‍ ബസ് സര്‍വിസുകളിലും 500 രൂപ ഈ മാസം 15 വരെ വിനിയോഗിക്കാം. അതുകഴിഞ്ഞാല്‍ സ്വന്തം ബാങ്ക് അക്കൗണ്ടില്‍ നിക്ഷേപിക്കാന്‍ മാത്രമേ കഴിയൂ. അതിനുള്ള സമയപരിധി 30ന് അവസാനിക്കും. പഴയ 1000 രൂപ നോട്ടുകളുടെ പൊതു ഉപയോഗം നിരോധിച്ചിട്ടുണ്ട്.