ഷി ജിൻപിങ് തങ്ങുന്ന ഹോട്ടലിന് പുറത്ത് പ്രതിഷേധം; തിബറ്റൻ അനുകൂലികൾ കസ്റ്റഡിയിൽ

ചെന്നൈ: ചൈനീസ് പ്രസിഡന്‍റ് ഷി ജിൻപിങ്ങിന് താമസിക്കാൻ ഒരുക്കിയ ഹോട്ടലിന് പുറത്ത് പ്രതിഷേധിച്ച അഞ്ച് തിബറ്റൻ അനുകൂലികളെ ചെന്നൈ പൊലീസ് കസ്റ്റഡിയിലെടുത്തു. ഐ.ടി.സിയുടെ ഗ്രാൻഡ് ചോള ഹോട്ടലിലാണ് രണ്ടു ദിന ഇന്ത്യാ സന്ദർശനത്തിനെത്തിയ ഷി ജിൻപിങ് താമസിക്കുക. ഇതിന് മുന്നിലായിരുന്നു പ്രതിഷേധം.

മറ്റ് ആറ് തിബറ്റൻ പ്രതിഷേധക്കാരെ കൂടി ചെന്നൈ എയർപോർട്ടിൽ കസ്റ്റഡിയിലെടുത്തതായി പൊലീസ് അറിയിച്ചു. ബംഗളൂരുവിൽ നിന്ന് എത്തിയതായിരുന്നു ഇവർ.

വെള്ളിയാഴ്ച ഉച്ചയോടെ ചെന്നൈയിലെത്തിയ ഷി ജിൻപിങ്ങിന് വൻ വരവേൽപ്പാണ് ലഭിച്ചത്. പ്രധാനമന്ത്രി നരേന്ദ്ര മോദിയും ചെന്നൈയിലെത്തിയിരുന്നു. പൗ​രാ​ണി​ക​ന​ഗ​ര​മാ​യ മ​ഹാ​ബ​ലി​പു​ര​ത്ത്​ ഇന്ന്​ വൈകിട്ടാണ് ഷി ജിൻപിങ്-മോദി​ അനൗപചാരിക ഉച്ചകോടി നടക്കുക.