കാർ ട്രക്കിലേക്ക് ഇടിച്ചു കയറി അഞ്ചുമരണം; നാലുപേർക്ക് പരിക്ക്

മുംബൈ: മുംബൈ - പൂനെ ഹൈവേയിൽ രാത്രിയുണ്ടായ കാറപകടത്തിൽ അഞ്ച് പേർ മരിച്ചു. നാലു പേർക്ക് പരിക്കേറ്റു. പുനെയിൽ നിന്ന് മുംബൈയിലേക് പോവുകയായിരുന്ന മാരുതി സുസുക്കി എർട്ടിഗ കാർ ട്രക്കിലേക്ക് ഇടിച്ചു കയറിയാണ് അപകടമുണ്ടായത്. രാത്രി 11.30 ഓടെയാണ് സംഭവം.

ഇടിയുടെ ആഘാതത്തിൽ കാറിലുണ്ടായിരുന്ന നാലു​പേർ സംഭവ സ്ഥലത്തു തന്നെ മരിച്ചു. കാർ പൂർണമായും തകർന്നു. പരിക്കേറ്റ നാലുപേരെയും എം.ജി.എം ആശുപത്രിയിൽ പ്രവേശിപ്പിച്ചു. മരിച്ചവരെല്ലാം പുരുഷൻമാരാണ്. പരിക്കേറ്റവരിൽ ഒരാൾ സ്ത്രീയാണ്.

കാറിൽ ഒമ്പത് യാത്രക്കാരുണ്ടായിരുന്നു. പരിക്കേറ്റവരിൽ ഒരാൾ ആശുപത്രിയിലേക്കുള്ള വഴിയിൽ മരിച്ചുവെന്ന് ഖൊപോളി പൊലീസ് സ്റ്റേഷൻ ഓഫീസർ പറഞ്ഞു.

മഹാരാഷ്ട്രയിലെ റായ്ഗഡ് ജില്ലയിൽ ഖൊപോളിക്കടുത്താണ് അപകടമുണ്ടായത്. കാർ നിയ​ന്ത്രണം വിട്ട് ട്രക്കിൽ ഇടിക്കുകയായിരുന്നു. സംഭവത്തിൽ അന്വേഷണം നടക്കുകയാണെന്ന് പൊലീസ് പറഞ്ഞു.