ഈ വർഷം ക്രിസ്ത്യാനികൾക്ക്​ നേരെ​ 486 അതിക്രമങ്ങൾ​; കൂടുതൽ യു.പിയിൽ

ന്യൂഡൽഹി: രാജ്യത്തെ പ്രബല ന്യൂനപക്ഷമായ ക്രിസ്​ത്യാനികൾക്കുനേരെ ബി.ജെ.പി ഭരണത്തിനുകീഴിൽ അതിക്രമങ്ങൾ നാൾക്കുനാൾ വർധിച്ചുവരുന്നതായി വസ്തുതാന്വേഷണ റിപ്പോർട്ട്​. 486 അതിക്രമങ്ങൾക്കാണ്​ 2021ൽ ഇന്ത്യയിലെ ക്രിസ്ത്യൻ സമുദായാംഗങ്ങൾ ഇരയായത്​.

2020ൽ 279 കേസുകളായിരുന്നു റിപ്പോർട്ട്​ ചെയ്യ​പ്പെട്ടത്​. ഒരുവർഷം കൊണ്ട്​ 75 ശതമാനം വർധനവ്​​ രേഖപ്പെടുത്തിയതായി ക്രിസ്ത്യൻ അവകാശ സംരക്ഷണ സംഘടനയായ യുനൈറ്റഡ് ക്രിസ്ത്യൻ ഫോറം പുറത്തിറക്കിയ റിപ്പോർട്ടിൽ പറയുന്നു. നരേന്ദ്ര മോദി അധികാരത്തിലേറിയ 2014 മുതൽ ഇതുവരെയുള്ള കാലയളവിൽ 2021ലാണ്​ ക്രിസ്ത്യാനികൾക്കുനേരെ ഏറ്റവും കൂടുതൽ അതിക്രമങ്ങൾ നടന്നത്​. ഇതിൽതന്നെ സുപ്രധാന ആഘോഷമായ ക്രിസ്മസിനോടനുബന്ധിച്ചായിരുന്നു ഭീതിയുടെ മുൾമുനയിലാഴ്ത്തിയ സംഭവങ്ങളിലേറെയും. നവംബർ, ഡിസംബർ മാസങ്ങളിലായി 104 അക്രമസംഭവങ്ങളാണ് അരങ്ങേറിയത്​. തൊട്ടുമുമ്പ്​ ഒക്ടോബറിൽ മാത്രം 77 അക്രമസംഭവങ്ങൾക്ക്​ രാജ്യത്തെ ക്രിസ്​ത്യാനികൾ ഇരയായി​.

വെള്ളിയാഴ്ച പുറത്തിറക്കിയ റിപ്പോർട്ട് അനുസരിച്ച് 127 സംഭവങ്ങളാണ്​ 2014ൽ രജിസ്റ്റർ ചെയ്തത്​. തുടർവർഷങ്ങളിൽ അതിക്രമങ്ങളുടെ എണ്ണം വർധിച്ചുകൊണ്ടേയിരുന്നു. 142 (2015), 226 (2016), 248 (2017), 292 (2018), 328 (2019), 279 (2020), 486 (2021) എന്നിങ്ങനെയാണ്​ കണക്ക്​.

ഇരകൾക്ക്​ പരാതി ഉന്നയിക്കാൻ യുനൈറ്റഡ് ക്രിസ്ത്യൻ ഫോറം ടോൾ-ഫ്രീ ഹെൽപ്പ് ലൈൻ ആരംഭിച്ചിരുന്നു. ഇതുവഴി നിരവധി അക്രമ സംഭവങ്ങൾ പൊലീസ്​-നിയമ സംവിധാനങ്ങളുടെ ശ്രദ്ധയിൽപെടുത്താൻ കഴിഞ്ഞതായി ഭാരവാഹികൾ പറഞ്ഞു. ഇപ്രകാരം ലഭിച്ച പരാതികളുടെ എണ്ണം കണക്കാക്കിയാണ്​ സംഘടന കുറ്റകൃത്യങ്ങളുടെ റിപ്പോർട്ട്​ തയാറാക്കിയത്​.

2021ൽ ആകെ അതിക്രമങ്ങളുടെ 56 ശതമാനവും (274 സംഭവങ്ങൾ) നാലുസംസ്ഥാനങ്ങളിലായാണ്​ അരങ്ങേറിയത്. ഇതിൽ യോഗി ആദിത്യനാഥ്​ ഭരിക്കുന്ന ഉത്തർപ്രദേശാണ്​ ഏറ്റവും മുന്നിൽ -102 എണ്ണം. ഛത്തീസ്ഗഢ് (90), ജാർഖണ്ഡ് (44), മധ്യപ്രദേശ് (38) എന്നിവയാണ്​ തൊട്ടുപിന്നിൽ.

''മതതീവ്രവാദികൾ അടങ്ങിയ ആൾക്കൂട്ടം പ്രാർത്ഥനാ സമ്മേളനത്തിൽ അതിക്രമിച്ച്​ കയറുകയോ അല്ലെങ്കിൽ നിർബന്ധിത മതപരിവർത്തനം ആരോപിച്ച്​ വ്യക്തികളെ വളയുകയോ ചെയ്യുന്നതാണ്​ മിക്കവാറും സംഭവങ്ങളുടെയും പൊതുസ്വഭാവം. നിർബന്ധിത മതപരിവർത്തനം ആരോപിച്ച് പൊലീസിന് കൈമാറുന്നതിന് മുമ്പ്, അക്രമിക്കൂട്ടം വിശ്വാസികളെ ഭീഷണിപ്പെടുത്തുകയും ശാരീരികമായി ആക്രമിക്കുകയും ചെയ്യുന്നു. മിക്കയിടത്തും പൊലീസ് സ്റ്റേഷനുകൾക്ക് പുറത്ത് വർഗീയ മുദ്രാവാക്യം വിളിക്കുന്നു. ഈ സമയത്തെല്ലാം പൊലീസ് നിശബ്ദ കാഴ്ചക്കാരായി നിൽക്കുകയാണ്" -റിപ്പോർട്ടിൽ പറയുന്നു.

ഹെൽപ്പ്‌ലൈൻ ഇടപെട്ട്​ കേസ്​ നടത്തിയും അഭിഭാഷകരെ ഏർപ്പാടാക്കിയും 210 പേരെ തടവിൽ നിന്ന് മോചിപ്പിക്കാൻ കഴിഞ്ഞതായി ഫോറം വ്യക്​തമാക്കി. കൂടാതെ അക്രമികൾ അടപ്പിച്ച 46 ആരാധനാലയങ്ങൾ വീണ്ടും തുറക്കുവാനും പ്രാർത്ഥന പുനരാരംഭിക്കാനും തങ്ങളുടെ ഇടപെടലിലൂടെ കഴിഞ്ഞതായി ഇവർ വ്യക്​തമാക്കി. അതേസമയം, അക്രമികൾക്കെതിരെ 34 എഫ്‌ഐആറുകൾ മാത്രമേ രജിസ്റ്റർ ചെയ്യാൻ കഴിഞ്ഞിട്ടുള്ളൂ.

'വിദ്വേഷപ്രചാരണം മതസൗഹാർദം തകർക്കുന്നു'

കുപ്രചാരണത്തിലൂടെ വിദ്വേഷം സൃഷ്ടിക്കുന്നത് മതസൗഹാർദത്തിന് ഹാനികരമാണെന്ന് ഫോറം ഭാരവാഹിയും ഡൽഹി ന്യൂനപക്ഷ കമ്മീഷൻ മുൻ അംഗവുമായ എ.സി മൈക്കിൾ 'ദി പ്രിന്‍റി'നോട്​ പറഞ്ഞു. 'ക്രിസ്ത്യാനികൾ ആളുകളെ വഞ്ചിച്ച് മതപരിവർത്തനം ചെയ്യുന്നു എന്നാരോപിക്കുന്ന പ്രസംഗങ്ങളിലൂടെ വിദ്വേഷം സൃഷ്ടിക്കുന്നതാണ്​ കുറ്റകൃത്യങ്ങൾ വർധിക്കുന്നതിന്​ പ്രധാന കാരണം. എന്നാൽ, നിർബന്ധിത മതപരിവർത്തനത്തിന്​ ഒരു തെളിവുമില്ല. മതപരിവർത്തന വിരുദ്ധ ബിൽ ഇപ്പോൾ പല സംസ്ഥാനങ്ങളിലും നിലവിലുണ്ട്. 1967 മുതൽ നിയമം പ്രാബല്യത്തിലുള്ള ഒഡീഷയിൽ ആ നിയമപ്രകാരം ഒരു ശിക്ഷപോലും ഉണ്ടായിട്ടില്ല "അദ്ദേഹം പറഞ്ഞു.

"പ്രത്യേക വിഭാഗത്തിലുള്ള ചിലരുടെ ഈ കുപ്രചാരണം പല സംസ്ഥാനങ്ങളിലും മതസൗഹാർദം തകരുന്നു. അക്രമികളും പൊലീസും തമ്മിലുള്ള അവിശുദ്ധബന്ധവും വിദ്വേഷ കുറ്റകൃത്യങ്ങൾക്ക്​ പ്രേരണയാവുന്നുണ്ട്​. പലപ്പോഴും പ്രാർത്ഥന നടക്കുന്ന പള്ളിക്ക് പുറത്ത് അക്രമികൾ ഒത്തുകൂടുമ്പോൾ പൊലീസ് വൈദികനെ അറസ്റ്റ് ചെയ്യുകയാണ്​ ചെയ്യുന്നത്​. അങ്ങനെ ചെയ്യാൻ ജനക്കൂട്ടം അവർക്കുമേൽ സമ്മർദം ചെലുത്തുന്നുണ്ട്​' -മൈക്കിൾ പറഞ്ഞു.