മൂന്നു വർഷത്തിനുള്ളിൽ നാലര ലക്ഷം ഇന്ത്യക്കാർ വിദേശപൗരത്വം സ്വീകരിച്ചു

ന്യൂഡൽഹി: മൂന്നുവർഷത്തിനിടെ 4.52 ലക്ഷം ഇന്ത്യക്കാർ വിദേശപൗരത്വം സ്വീകരിച്ചതായി വിദേശകാര്യമന്ത്രാലയം.  2014 മുതൽ 2017 വരെ കാലയളവിൽ 117 രാജ്യങ്ങളിലുള്ള 4,52,109 ഇന്ത്യക്കാരാണ്​ ഇന്ത്യൻ പൗരത്വം ഉപേക്ഷിച്ച്​  വിദേശപൗരത്വം സ്വീകരിച്ചത്​. സി.പി.​എം എം.പി ജിതേന്ദ്ര ചൗധരിയുടെ ചോദ്യത്തിന്​ ലോക്​ സഭയിലാണ്​ വിദേശ കാര്യ സഹമന്ത്രി വി.കെ സിങ് മറുപടി നൽകിയത്​. 

2016ൽ മാത്രം യു.എസ്​ പൗരത്വം നേടാനായി 46,188 പേരാണ്​ ഇന്ത്യൻ​ പൗരത്വം ഉപേക്ഷിച്ചത്​. 2015ൽ ഇത്​ 42213 ആയിരുന്നു. യു.എസ്​ പൗരത്വം നേടുന്നതിൽ മെക്​സിക്കോയിൽ നിന്നുള്ളവരാണ്​ മുൻപന്തിയിലുള്ളത്​.  103550 മെക്​സിക്കോക്കാർ യു.എസ്​ പൗരത്വം നേടി. രണ്ടാം സ്​ഥാനം ഇന്ത്യക്കാർക്കാണ്​.

കാലിഫോർണിയയിൽ നിന്ന്​ 10298, ന്യൂജേഴ്​സിയിൽ നിന്ന്​ 5312, ടെക്​സാസിൽ 4670, ന്യൂയോർക്കിൽ നിന്ന്​ 2954 പേരും യു.എസ്​ പൗരത്വം നേടിയെന്നും വിദേശ കാര്യ മന്ത്രാലയം അറിയിച്ചു. അതിവിദഗ്​ധരായ പ്രഫഷണലുകളുടെ പാത പിന്തുടരാനാണ്​ ഇന്ത്യക്കാർ യു.എസിലേക്ക്​ കുടിയേറുന്നതെന്നും  മന്ത്രാലയം വിശദീകരിച്ചു.