ഡൽഹിയിൽ ഒരേ കെട്ടിടത്തിൽ താമസിക്കുന്ന 44 പേർക്ക്​ കോവിഡ്​ പോസിറ്റീവ്​

ന്യൂഡൽഹി: ഡൽഹിയിലെ കാപശേരയിൽ ഒരേ കെട്ടിടത്തിൽ താമസിക്കുന്ന 44 പേർക്ക്​ കോവിഡ്​ വൈറസ്​ ബാധ സ്ഥിരീകരിച്ചു. ഏപ്രിൽ 18 ന്​ വൈറസ്​ ബാധ സ്ഥിരീകരിക്കപ്പെട്ട രോഗി താമസിച്ച കെട്ടിടമാണിത്​. 

രോഗിയുമായി ബന്ധമുണ്ടായിരുന്ന 175 പേരുടെ സാമ്പിളുകൾ 10 ദിവസം മുമ്പാണ്​​ പരിശോധനക്കയച്ചത്​. ഇവരെ നിരീക്ഷണത്തിലാക്കുകയും പ്രദേശം അടച്ചുപൂട്ടുകയും ചെയ്​തിരുന്നു. 67 പേരുടെ പരിശോധനാ ഫലമാണ്​ ഇന്ന്​ ലഭിച്ചത്​. പരിശോധനാ ഫലം വൈകുന്നതിൽ  നിരീക്ഷണത്തിൽ കഴിയുന്നവർ​ ആശങ്ക പ്രകടിപ്പിച്ചു. ഫലം വൈകുന്നത്​  രോഗ വ്യാപനത്തിന്​ കാരണമാവുകയും ചെയ്​തേക്കാം. 

ഡൽഹിയിൽ ഇതുവരെ 3738 പേർക്കാണ്​ കോവിഡ്​ ബാധ സ്ഥിരീകരിച്ചത്​. 61 പേർക്ക്​ ജീവൻ നഷ്​ടമായി. ഡൽഹിയിലെ 11 ജില്ലകളും റെഡ്​ സോണായി പ്രഖ്യാപിച്ചിട്ടുണ്ട്​. മേയ്​ 17 വരെ എല്ലാ ജില്ലകളും റെഡ്​ സോണായി തുടരുമെന്ന്​ ആരോഗ്യമന്ത്രി സത്യേന്ദ്ര ജെയിൻ അറിയിച്ചിരുന്നു.