വികാസ് ദുബെ ഏറ്റുമുട്ടൽ കൊല: നാലു പൊലീസുകാർക്കും പരിക്കേറ്റെന്ന് പൊലീസ്
text_fields
കാൺപൂർ: രക്ഷപ്പെടാൻ ശ്രമിക്കുന്നതിനിടെ വികാസ് ദുബെ പൊലീസുകാർക്ക് നേരെയും വെടിവെച്ചെന്ന് യു.പി പൊലീസ്. സംഭവത്തിൽ പരിക്കേറ്റ നാലു പൊലീസുകാർ ആശുപത്രിയിൽ ചികിത്സയിലാണെന്നും കാൺപൂർ ഐ.ജി മോഹിത്കുമാർ പറഞ്ഞു.
‘അറസ്റ്റിലായ ദുബയെ കൊണ്ടുപോയ വാഹനം അപകടത്തിൽപ്പെട്ടിരുന്നു. ഇതിനിടെ വാഹനത്തിലുണ്ടായിരുന്ന പൊലീസുകാരുടെ പിസ്റ്റൾ കൈക്കലാക്കി അവർക്കുനേരെ വെടിയുതിർത്ത് ദുബെ രക്ഷപ്പെടാൻ ശ്രമിക്കുകയായിരുന്നു. തിരിച്ചു വെടിവെച്ചപ്പോഴാണ് ദുബെക്ക് പരിക്കേറ്റതെന്നും ആശുപത്രിയിലേക്ക് പോകും വഴിയാണ് മരിച്ചതെന്നും കാൺപൂർ സോൺ എ.ഡി.ജി ജയ നാരായൺ സിങ് പറഞ്ഞു.
കാൺപൂരിൽ ഡി.സി.പി അടക്കം എട്ടുപൊലീസുകാരെ വെടിവെച്ചുകൊന്ന സംഭവത്തിൽ വ്യാഴായ്ചയായിരുന്നു മധ്യപ്രദേശിലെ ഉജ്ജയിനിലെ ക്ഷേത്രത്തിൽവെച്ച് വികാസ് ദുബെയെ പൊലീസ് അറസ്റ്റ് ചെയ്തത്. ദിവസങ്ങളോളം പൊലീസ് വലവിരിച്ചെങ്കിലും അവരുടെ കണ്ണുവെട്ടിച്ച് കാൺപൂരിൽ നിന്ന് ഫരീദാബാദിലേക്കും തുടർന്ന് മധ്യപ്രദേശിലേക്കും ദുബെ രക്ഷപ്പെട്ടത്. പരിശോധനകളൊന്നുമില്ലാതെ 1500 കിലോ മീറ്ററാണ് ദുബെ താണ്ടിയത്.
Latest Video: