81 ദിവസത്തിനിടെ രാജ്യത്ത്​ കൊല്ലപ്പെട്ടത്​ 39 കടുവകൾ; കൂടുതൽ മഹാരാഷ്​ട്രയിൽ- 15

മുംബൈ: 2021ൽ ആദ്യ 81 ദിവസങ്ങളിലെ കണക്കുകൾ പ്രകാരം രാജ്യത്ത്​ കൊല്ലപ്പെട്ടത്​ 39 കടുവകൾ. കൺ​സർവേഷൻ ലെൻസസ്​ ആന്‍റ്​ വൈൽഡ്​ലൈഫ്​ എന്ന സംഘടന പുറത്തുവിട്ട കണക്കുകൾ മഹാരാഷ്​ട്രയാണ്​ കടുവക്കുരുതിയിൽ ഏറ്റവും മുന്നിൽ- 15 മരണം. അഥവാ, 41 ശതമാനം. മധ്യപ്രദേശിൽ ഒമ്പതും ഉത്തരാഖണ്ഡിൽ അഞ്ചും കടുവകൾ​ കൊല്ലപ്പെട്ടിട്ടുണ്ട്​. കേരളവും പട്ടികയിലുണ്ട്​.

മഹാരാഷ്​ട്ര ആസ്​ഥാനമായുള്ള സംഘടനയാണ്​ കണക്കുകൾ ശേഖരിക്കുന്നത്​. ​വേനൽകാലം കൂടുതൽ ശക്​തി പ്രാപിക്കുന്ന വരുംമാസങ്ങളിൽ കടുവ വേട്ട ശക്​തിപ്രാപിക്കുമെന്നും സർക്കാറുകൾ ഉണരണമെന്നും സംഘടന പറയുന്നു. മഹാരാഷ്​ട്രയും മധ്യപ്രദേശും ഉൾപെടുന്ന മധ്യേന്ത്യയിലാണ്​ കടുവവേട്ട ഏറ്റവും കൂടുതൽ. ജനപ്രിയ കടുവ സ​ങ്കേതങ്ങൾക്കടുത്തും അവയോടു ചേർന്ന വനമേഖലയിലുമാണ്​ ഇവ പ്രധാനമായി നടക്കുന്നത്​.

അതേ സമയം, സർക്കാർ രേഖകൾ പ്രകാരം ​ഫെബ്രുവരി 14 വരെയായി രാജ്യത്ത്​ 22 കടുവകളാണ്​ കൊല്ലപ്പെട്ടത്​. 2020ൽ മൊത്തം 103 കടുവകളും കൊല്ലപ്പെട്ടു.