രാജ്യത്ത്​ ശമനമില്ലാതെ കോവിഡ് ; മരണവും കൂടുന്നു

ന്യൂഡൽഹി: ഇന്ത്യയിൽ കോവിഡ്​ രോഗബാധ അതിതീവ്രമായി തുടരുന്നു. 3,79,257 പേർക്കാണ്​ കഴിഞ്ഞ ദിവസം മാത്രം കോവിഡ്​ ബാധിച്ചത്​. ഇതോടെ രാജ്യത്ത്​ കോവിഡ്​ ബാധിച്ചവരുടെ എണ്ണം 1,83,76,524 ആയി ഉയർന്നു. കഴിഞ്ഞ ഒരാഴ്​ചയായി ഇന്ത്യയിലെ കോവിഡ്​ രോഗികളുടെ എണ്ണം മൂന്ന്​ ലക്ഷത്തിന്​ മുകളിലാണ്​. ഏപ്രിൽ 22നാണ്​ രാജ്യത്ത്​ ആദ്യമായി മൂന്ന്​ ലക്ഷത്തിലധികം കോവിഡ്​ കേസുകൾ റിപ്പോർട്ട്​ ചെയ്​തത്​.

30,84,814 പേരാണ്​ നിലവിൽ രോഗം ബാധിച്ച്​ ചികിത്സയിലുള്ളത്​. 3645 പേർ കഴിഞ്ഞ ദിവസം രോഗം ബാധിച്ച്​ മരിച്ചു. 2,04,832 ആണ്​ രാജ്യത്തെ ആകെ കോവിഡ്​ മരണം. 2,69,507 പേർക്ക്​ കഴിഞ്ഞ ദിവസം മാത്രം രോഗമുക്തിയുണ്ടായി. 15,00,20,648 പേർക്ക്​ വാക്​സിൻ നൽകിയെന്നും കേന്ദ്രസർക്കാർ അറിയിച്ചു.

രാജ്യത്ത്​ റിപ്പോർട്ട്​ ചെയ്യുന്ന 78.53 ശതമാനം കോവിഡ്​ കേസുകളും 10 സംസ്ഥാനങ്ങളിൽ നിന്നാണെന്ന്​ ആരോഗ്യമന്ത്രാലയം അറിയിച്ചു. മഹാരാഷ്​ട്ര, ഉത്തർപ്രദേശ്​, കേരള തുടങ്ങിയ സംസ്ഥാനങ്ങളിലാണ്​ രോഗികൾ ഏറ്റവും കൂടുതലുള്ളത്​. കോവിഡ്​ വ്യാപനം രൂക്ഷമാകുന്നതിനിടെ 18 മുതൽ 44 വയസ്​ വരെ പ്രായമുള്ളവർക്ക്​ വാക്​സിൻ നൽകാനുള്ള പ്രവർത്തനങ്ങൾക്ക്​ കേന്ദ്രസർക്കാർ തുടക്കം കുറിച്ചിരുന്നു.