80 ശതമാനവും ലോക്​ഡൗണിലായി രാജ്യം; കോവിഡ്​ വ്യാപനം അതിതീവ്രമായി തുടരുന്നു

ന്യൂഡൽഹി: കോവിഡ്​ ബാധയിൽ രാജ്യത്ത്​ നേരിയ കുറവ്​. ബുധനാഴ്ച 348,421 പേർക്കാണ്​ പുതുതായി വൈറസ്​ കണ്ടെത്തിയത്​. 4,205 പേർ 24 മണിക്കൂറിനിടെ മരണത്തിന്​ കീഴടങ്ങി. മൊത്തം മരണസംഖ്യ രണ്ടര ലക്ഷം കടന്നു- 254,197 പേർ.

ഏറ്റവും കൂടുതൽ കോവിഡ്​ ബാധിതരു​ള്ള മഹാരാഷ്​ട്രയിലും ഡൽഹിയിലും വാക്​സിൻ ക്ഷാമം വില്ലനാകു​േമ്പാഴും പുതുതായി 24,46,674 പേർക്ക്​ രാജ്യത്ത്​ വാക്​സിൻ നൽകിയതായി ആരോഗ്യ മന്ത്രാലയം അറിയിച്ചു.

വാക്​സിന്​ കടുത്ത ക്ഷാമം നേരിടുന്ന ഡൽഹിയിൽ വാക്​സിൻ വിതരണം ചെയ്യുന്ന 125 കേന്ദ്രങ്ങൾ ചൊവ്വാഴ്ച അടച്ചിരുന്നു.

രോഗബാധ അതിരൂക്ഷമായി തുടരുന്ന രാജ്യത്ത്​ വിവിധ സംസ്​ഥാനങ്ങളിൽ കടുത്ത നിയന്ത്രണം തുടരുകയാണ്​. 80 ശതമാനം ജനസംഖ്യയു​ം ലോക്​ഡൗണിലായതിനു പുറമെ അവശേഷിച്ച ​ഇടങ്ങളിലും നിയന്ത്രണം ശക്​തമായി നിലനിൽക്കുന്നുണ്ട്​. ഡൽഹി, ഹരിയാന, ഉത്തർ പ്രദേശ്​ സംസ്​ഥാനങ്ങൾ ലോക്​ഡൗൺ മേയ്​ 17 വരെ നീട്ടിയിട്ടുണ്ട്​. തമിഴ്​നാട്ടിലും രാജസ്​ഥാനിലും തിങ്കളാഴ്ചയാണ്​ രണ്ടാഴ്ചത്തെ ലോക്​ഡൗൺ ആരംഭിച്ചത്​.