ഉവൈസിക്കെതിരെ കേസെടുത്തതിൽ പ്രതിഷേധിച്ച 30 പേർ ജുഡീഷ്യൽ കസ്റ്റഡിയിൽ

ന്യൂഡൽഹി: എ.ഐ.എം.ഐ.എം നേതാവ് അസദുദ്ദീൻ ഉവൈസിക്കെതിരെ കേസെടുത്ത നടപടിയിൽ പ്രതിഷേധിച്ചതിന് അറസ്റ്റിലായ 30 പേരെ പാട്യാല ഹൗസ് കോടതി മൂന്ന് ദിവസത്തെ ജുഡീഷ്യൽ കസ്റ്റഡിയിൽ വിട്ടു. വ്യാഴാഴ്ച പാർലമെന്റ് സ്ട്രീറ്റ് പൊലീസ് സ്റ്റേഷന് പുറത്തായിരുന്നു പ്രതിഷേധം. സ്ത്രീകളടക്കം ഇതിൽ പങ്കാളികളായിരുന്നു.

ബി​.ജെ.പി നേതാക്കൾ നടത്തിയ പ്രവാചക വിരുദ്ധ പരാമർശങ്ങളെ തുടർന്ന് സമൂഹ മാധ്യമങ്ങളിലൂടെ ആളുകൾക്കിടയിൽ ഭിന്നതയുണ്ടാക്കാൻ ശ്രമിച്ചെന്നാരോപിച്ചാണ് ഉവൈസിക്കെതിരെ കേസെടുത്തത്. ഉവൈസിക്ക് പുറമെ വിവാദ പരാമർശം നടത്തിയ നൂപുർ ശർമ, നവീൻ കുമാർ ജിൻഡാൽ, യതി നരസിംഹാനന്ദ് തുടങ്ങി നിരവധി പേർക്കെതിരെയാണ് പൊലീസ് കേസെടുത്തിരുന്നത്.