യു.പിയിൽ മൂന്നു വയസുകാരിയെ പീഡിപ്പിച്ച്​ കൊലപ്പെടുത്തി; മൂന്നാഴ്​ചക്കിടെ മൂന്നാമത്തെ സംഭവം

ലഖീംപൂർ: ഉത്തർപ്രദേശിലെ ലഖീംപൂരിൽ 20 ദിവസത്തിനിടെ മൂന്നാമത്തെ പെൺകുട്ടി ക്രൂര പീഡനത്തിനിരയായി കൊല്ലപ്പെട്ടു. ലഖീംപൂർ ഖേരിയിൽ മൂന്ന്​ വയസുകാരിയെ ബലാത്സംഗത്തിനിരയാക്കിയ ശേഷം ശ്വാസംമുട്ടിച്ച്​ കൊലപ്പെടുത്തിയ ശേഷം കരിമ്പിൻ പാടത്ത്​ ഉപേക്ഷിച്ചതായി പൊലീസ്​ പറഞ്ഞു.

ബുധനാഴ്​ച മുതൽ കാണാതായിരുന്ന പെൺകുട്ടിയെയാണ്​ വ്യാഴാഴ്​ച രാവിലെ സിങ്കാഹി പ്രദേശത്തെ പാടത്ത്​ മരിച്ച നിലയിൽ കാണപ്പെട്ടത്​. വീടിന്​ അരക്കിലോമീറ്റർ അകലെ മാരകമായ പരിക്കുകളോടെയാണ്​ പെൺകുട്ടിയെ കാണ്ടെത്തിയത്​. കൊലപാതകമാണെന്ന്​ പൊലീസ്​ സ്​ഥിരീകരിച്ചു. ലൈംഗിക പീഡനം നടന്നതായി പോസ്​റ്റ്​മോർട്ടം റിപ്പോർട്ടിലുണ്ട്​.

ഗ്രാമവാസിയായ ലേഖ്​റാം എന്നയാൾക്കെതിരെ പെൺകുട്ടിയുടെ പിതാവ്​ പൊലീസിൽ പരാതി നൽകി. കുടുംബവുമായുള്ള പഴയ വൈരാഗ്യത്തിൻെറ പേരിൽ ഇയാൾ മകളെ തട്ടിക്കൊണ്ടുപോയി ​കൊലപ്പെടുത്തുകയായിരുന്നുവെന്നാണ്​ പരാതി. പ്രതിയെ പിടികൂടുന്നതിനായി പൊലീസ്​ പ്രത്യേക സംഘങ്ങളെ നിയോഗിച്ചു.

13 വയസുകാരിയെ ക്രൂരമായി പീഡിപ്പിച്ച്​ കണ്ണുകൾ ചൂഴ്​ന്നെടുത്ത സംഭവത്തിലൂടെയാണ്​ ലഖീംപൂർ സമീപകാലത്ത്​ വാർത്തകളിൽ ഇടംപിടിച്ചത്​. ദിവസങ്ങൾ പിന്നിടും മു​മ്പ്​ സ്​കോളർഷിപ്പ്​ ഫോം പൂരിപ്പിക്കാനായി വീട്ടിൽ നിന്നിറങ്ങിയ 17കാരിയും ബലത്സംഗത്തിനിരയായി കൊല്ലപ്പെട്ടു. ഗ്രാമത്തിൽ നിന്നും 200 മീറ്റർ അകലെ കുളത്തിന്​ സമീപത്താണ്​ വികൃതമാക്കപ്പെട്ട നിലയിൽ മൃതദേഹം കണ്ടെത്തിയത്​.

അന്വേഷണം തുടരുകയാണെന്നും ശക്​തമായ നടപടി സ്വീകരിക്കുമെന്നും ലഖീംപൂർ ഖേരി എസ്​.പി സത്യേന്ത്രകുമാർ പറഞ്ഞു. സംസ്​ഥാനത്തെ ക്രമസമാധാന നില ആകെ താറുമാറായെന്ന്​ ആരോപിച്ച്​ യോഗി ആദിത്യനാഥ്​ സർക്കാറിനെതിരെ പ്രതിപക്ഷ കക്ഷികളായ കോൺഗ്രസും സമാജ്​വാദി പാർട്ടിയും രംഗത്ത്​ വന്നിരുന്നു.

സ്​ത്രീകൾക്കും പ്രായപൂർത്തിയാകാത്ത പെൺകുട്ടികൾക്കുമെതിരായ അതിക്രമം കൂടിയ സാഹചര്യത്തിൽ സംസ്​ഥാന സർക്കാർ മുതിർന്ന പൊലീസ്​ ഉദ്യോഗസ്​ഥൻ നേതൃത്വം നൽകുന്ന പ്രത്യേക സംഘടനക്ക്​​ രൂപം നൽകിയിരുന്നു. സ്​ത്രീ സുരക്ഷ ഉറപ്പു വരുത്താനും ഇത്തരം കേസുകൾ കൈകാര്യം ചെയ്യുകയുമാകും ഇവരുടെ കർത്തവ്യം.