താജ്​മഹലിൽ​ പ്രാർഥന നടത്തിയ​ മൂന്ന്​ ഹിന്ദു മഹാസഭ പ്രവർത്തകർ അറസ്റ്റിൽ

ആഗ്ര: ചരിത്ര സ്​മാരകമായ താജ്​മഹൽ സമുച്ചയത്തിനുള്ളിൽ വെച്ച്​ പ്രാർഥന നടത്തിയ മൂന്ന്​ ഹിന്ദു മഹാസഭ പ്രവർത്തകരെ അറസ്റ്റ്​ ചെയ്​തു. താജ്​മഹൽ കോമ്പൗണ്ടിനുള്ളിൽ പ്രവേശിച്ച്​​ ശിവ പ്രതിഷ്​ഠയിൽ പ്രാർഥന നടത്തിയതിനാണ്​ ഒരു സ്​ത്രീയടക്കം മൂന്ന്​ പേരെ അറസ്റ്റ്​ ചെയ്​തത്​. സ്​മാരക സംരക്ഷണത്തിനായി വിന്യസിച്ച സി.ഐ.എസ്​.എഫ്​ ജവാൻമാരാണ്​ മൂവരെയും പിടികൂടി പൊലീസിലേൽപ്പിച്ചത്​. അവർക്കെതിരെ കേസെടുത്തിട്ടുണ്ടെന്നും താജ്​ഗഞ്ച്​ പൊലീസ്​ സ്​റ്റേഷനിലെ ഇൻസ്​പെക്​ടർ ഉമേഷ്​ ചന്ദ്ര ത്രിപാഠി പറഞ്ഞു. സമുച്ചയത്തിലെ സെൻട്രൽ ടാങ്കിന് സമീപമുള്ള ബെഞ്ചിലിരുന്ന് ഹിന്ദു മഹാസഭയുടെ പ്രവിശ്യാ പ്രസിഡന്‍റ്​ മീന ദിവാകർ മറ്റ് രണ്ട് പേരോടൊപ്പം പ്രാർഥിക്കാൻ തുടങ്ങുകയായിരുന്നു.

കഴിഞ്ഞ വർഷം ഒക്​ടോബറിൽ താജ്​മഹലിനുള്ളിലേക്ക്​ കാവിക്കൊടിയുമായി അതിക്രമിച്ചു കയറിയതിന്​ ഹിന്ദു ജാഗരൺ മഞ്ച്​ എന്ന സംഘടനയുടെ പ്രവർത്തകർ പിടിയിലായിരുന്നു. ആർ.എസ്​.എസുമായി അടുത്തുനിൽക്കുന്ന സംഘടനയായ ഹിന്ദു ജാഗരൺ മഞ്ചിന്‍റെ​ ആഗ്ര യൂണിറ്റ്​ പ്രസിഡന്‍റ് ഗൗരവ് താക്കൂറിന്‍റെ നേതൃത്വത്തിൽ അവിടെ പ്രാർഥന നടത്തുകയും ചെയ്​തിരുന്നു.

'താജ്​മഹൽ യഥാർഥത്തിൽ തേജോമഹാലയ എന്ന ശിവക്ഷേത്രമായിരുന്നു. കുറച്ച് വർഷങ്ങളായി ഞാൻ താജ്​മഹലിൽ എത്താറുണ്ട്​. അഞ്ച് തവണയെങ്കിലും ഇവിടെവച്ച്​ ശിവനോട് പ്രാർഥിച്ചിട്ടുണ്ട്. സ്​മാരകം ഹിന്ദുക്കൾക്ക് കൈമാറാൻ സർക്കാർ സമ്മതിക്കുന്നതുവരെ അത് തുടരും'- ഗൗരവ് താക്കൂർ പ്രാദേശിക മാധ്യമപ്രവർത്തകരോട് പറഞ്ഞത്​ ഇങ്ങനെയായിരുന്നു. ​