ഓടുന്ന തീവണ്ടിയോടൊപ്പം സെൽഫിയെടുത്ത മൂന്ന് കുട്ടികൾ മരിച്ചു

ബംഗളൂരു: സെൽഫി ഭ്രമം മൂന്നു യുവാക്കളുടെകൂടി ജീവൻ കവർന്നു. ഒാടുന്ന ട്രെയിനിന്​ മുന്നിൽ റെയിൽ​പാളത്തിൽ നിന്ന്​ സെൽഫിയെടുക്കാൻ ശ്രമിച്ച യുവാക്കളെ ​ട്രെയിൻ ഇടിച്ചുതെറിപ്പിച്ചു. ബംഗളൂരു ജയനഗറിലെ നാഷനൽ കോളജ്​ വിദ്യാർഥികളായ പ്രഭു ആനന്ദ്​ (18), രോഹിത്​ (16), പ്രതീക്​ (20) എന്നിവരാണ്​ മരിച്ചത്​. 10 പേരടങ്ങുന്ന സംഘം വണ്ടർല അമ്യൂസ്​മ​െൻറ്​ പാർക്കിലേക്ക്​ യാത്ര പോകുന്നതിനിടെയാണ്​ അപകടം. 

ചൊവ്വാഴ്​ച രാവിലെ 8.30ന്​ രാമനഗര ബിഡദി മഞ്ചനായകനഹള്ളിയിൽ വണ്ടർല റെയിൽവേ ഗേറ്റിലാണ്​ സംഭവം. ബംഗളൂരുവിൽനിന്ന്​ മൈസൂരുവിലേക്ക്​ പോവുകയായിരുന്ന ഗോൽഗുംബസ്​ എക്​സ്​പ്രസിന്​ മുന്നിൽനിന്ന്​ സെൽഫിയെടുക്കാനുള്ള ശ്രമമാണ്​ ദുരന്തത്തിൽ കലാശിച്ചത്​. മൃതദേഹം തിരിച്ചറിയാനാവാത്തവിധം ഛിന്നഭിന്നമായി​. റെയിൽവേ പൊലീസ്​ സൂപ്രണ്ട്​ എൻ. ചൈത്രയുടെ നേതൃത്വത്തിലുള്ള സംഘം സംഭവസ്​ഥലത്തെത്തി. മൃതദേഹങ്ങൾ പോസ്​റ്റ്​ മോർട്ടത്തിന്​ കെ​േങ്കരിയിലെ ആശുപത്രിയിലേക്ക്​ മാറ്റി. 

യുവാക്കളുടെ ബൈക്കുകളും ബാഗും മൈസൂരു റോഡിൽ റെയിൽവേ ട്രാക്കിന്​ സമീപം കണ്ടെത്തി. ഒരാഴ്​ചക്കിടെ രാമനഗര ജില്ലയിലെ രണ്ടാമത്തെ സെൽഫി ദുരന്തമാണിത്​. കഴിഞ്ഞയാഴ്​ച കനകപുരയിൽ എൻ.സി.സി ക്യാമ്പിനിടെ കുളത്തിൽ മുങ്ങിമരിച്ച ജി. വിശ്വനും നാഷനൽ കോളജ്​ വിദ്യാർഥിയായിരുന്നു. സെൽഫിയെടുക്കാനുള്ള തിരക്കിനിടെ വിശ്വൻ വെള്ളത്തിൽ മുങ്ങിയത്​ സഹപാഠികൾ അറിഞ്ഞില്ല.