ഡിഫൻസ് വളന്‍റിയറുടെ ക്രൂരകൊലപാതകം: ബലാത്സംഗം നടന്നെന്ന്​ കുടുംബം, സുപ്രീം കോടതിയെ സമീപിക്കും

ന്യൂഡൽഹി: ഡൽഹി സിവിൽ ഡിഫൻസ് വളന്‍റിയറായ 21 കാരി ക്രൂരമായി ​കൊല്ലപ്പെട്ട സംഭവത്തിൽ സുപ്രീംകോടതിയെ സമീപിക്കാെനാരുങ്ങി കുടുംബം. കൊലപാതകത്തിൽ വിശദമായ അന്വേഷണം വേണമെന്നും കേസ്​ സി.ബി.ഐ ഏറ്റെടുക്കണമെന്നും ബന്ധുക്കൾ ആവശ്യപ്പെട്ടു. കൂട്ടബലാത്സംഗത്തിനിരയായതായും യഥാർഥ പ്രതികളെ രക്ഷിക്കാനാണ്​ പൊലീസും ഉന്നതരും ശ്രമിക്കുന്നതെന്നും ഇവർ ആരോപിച്ചു. കേസിൽ നിയമസഹായം നൽകുമെന്ന്​ പ്രമുഖ അഭിഭാഷകൻ മഹ്​മൂദ്​ പ്രാച്ച അറിയിച്ചു. ഇദ്ദേഹം പെൺകുട്ടിയുടെ വീട്​ സന്ദർശിച്ചു.

ഹരിയാന അതിർത്തിയിലെ സൂരജ്​കുണ്ഡിൽ ആഗസ്റ്റ്​ 27നാണ്​ യുവതിയുടെ മൃതദേഹം കണ്ടെത്തിയത്​. മാറിടം മുറിച്ചുമാറ്റുകയും സ്വകാര്യ ഭാഗങ്ങളിൽ മാരകായുധങ്ങൾ ഉപയോഗിച്ച്​ കുത്തിപ്പരിക്കേൽപിക്കുകയും ചെയ്​തിട്ടുണ്ട്​. അമ്പതോളം മുറിവുകൾ ശരീരത്തിലുണ്ട്. കൊലപാതകത്തിന് പിന്നിൽ ഒന്നിൽ കൂടുതൽ പേരുണ്ടെന്നാണ് യുവതിയുടെ പിതാവിന്‍റെ ആരോപണം. യുവതിയെ കാണാതായ ഉടൻ ഡൽഹി സംഘംവിഹാറിലെ പൊലീസ്​ സ്​റ്റേഷനിൽ ​ ബന്ധുക്കൾ പരാതി നൽകിയിരുന്നു. എന്നാൽ, പരാതി ലഭിച്ച ഉടനെ അന്വഷിക്കാൻ പൊലീസ് തയാറായില്ലെന്നും ഇവർ ആരോപിക്കുന്നു.

അതേസമയം, യുവതിയുടെ ഭർത്താവെന്ന്​ അവകാശപ്പെടുന്ന നിസാമുദ്ദീനെ പൊലീസ്​ അറസ്റ്റ്​ ചെയ്​തിരുന്നു. വിവാഹിതയായ വിവരം യുവതി ബന്ധുക്കളിൽ നിന്ന് മറച്ചു​െവച്ചുരുന്നുവെന്നും നിസ്സാമുദ്ദീന്‍റെ സംശയം കാരണമാണ് ക്രൂരമായ കൊലപാതകം നടന്നതെന്നും പൊലീസ് ആവർത്തിക്കുന്നു. യുവതി കൂട്ട ബലാത്സംഗത്തിനിരയായതിന്​ പോസ്റ്റ്മോർട്ടം റിപ്പോർട്ടിൽ തെളിവുകളില്ല. ശക്തമായ അടിയിലുണ്ടായ ക്ഷതമാണ് മരണകാരണമായി റിപ്പോർട്ടിൽ പറയുന്നത്. ഈ സാഹചര്യത്തിൽ വീണ്ടും പോസ്റ്റ്മോർട്ടം ചെയ്യണമെന്നാണ് ബന്ധുക്കളുടെ ആവശ്യം.

പൊലീസ് പറയുന്നത് ഇങ്ങനെ: ആഗസ്റ്റ് 26ന് കാളിന്ദികുഞ്ച്​ പൊലീസ് സ്റ്റേഷനിൽ വന്ന നിസാമുദ്ദീൻ എന്നയാൾ കൊലക്കുറ്റം ഏറ്റുപറഞ്ഞു. മൃതദേഹം ഹരിയാനയിലെ ഫരീദാബാദിൽ ഉപേക്ഷിച്ചുവെന്നും ഇയാൾ പൊലീസിനെ അറിയിച്ചു. ഡൽഹി പൊലീസ് ഈ വിവരം ഹരിയാന പൊലീസിന് കൈമാറി. 27ാം തീയതി ഫരീദാബാദിലെ സൂരജ്കുണ്ഡിൽ നിന്ന് മൃതദേഹം കണ്ടെത്തി. യുവതിയും താനും രഹസ്യമായി രജിസ്റ്റർ വിവാഹം ചെയ്തവരാണെന്നും സംശയത്തിന്‍റെ പേരിലാണ് ഭാര്യയെ കൊന്നതെന്നും നിസാമുദ്ദീൻ സമ്മതിച്ചു.