അറസ്​റ്റിലായ മുൻ ഉദ്യോഗസ്ഥൻ ബി.കെ ബൻസാലും മകനും ആത്​മഹത്യ ചെയ്​തു

ന്യൂഡൽഹി: അഴിമതികേസിൽ ഉൾപ്പെട്ട കോർപറേറ്റ്​ മന്ത്രാലയ മുൻ ഉദ്യോഗസ്ഥൻ ബി.കെ ബൻസാലും മകനും ആത്​മഹത്യ ചെയ്​തു. ചൊവ്വാഴ്​ച രാവിലെ ബൻസാലിനെയും മകൻ യോഗേഷിനെയും(28) കിഴക്കൻ ഡൽഹിയിലെ വസതിയിൽ തൂങ്ങിമരിച്ച നിലയിൽ  കണ്ടെത്തുകയായിരുന്നു. കോർപ്പറേറ്റ് അഫയേഴ്സ് മന്ത്രാലയത്തിലെ മുൻ ഡയറക്ടർ ജനറൽ ആയ ബന്‍സാലിനെ അഴിമതി കേസിൽ സി.ബി.​െഎ നേരത്തെ അറസ്​റ്റു ചെയ്​തിരുന്നു. ആഗസ്​റ്റ്​ 26നാണ്​ അദ്ദേഹം ജാമ്യത്തിലിറങ്ങിയത്​.

വസതിയിലെ നാലുമുറികളിലും ആത്​മഹത്യ കുറിപ്പി​​െൻറ പകർപ്പുകൾ വെച്ചിരുന്നു. ആത്​മഹത്യാകുറിപ്പിൽ ഇരുവരുടെയും ഫോ​േട്ടായും ബന്ധുക്കളുടെ ഫോൺ നമ്പറുകളും എഴുതിയിട്ടുണ്ട്​. തിങ്കളാഴ്​ച രാത്രിയാണ്​ മരണം നടന്നിട്ടുള്ളതെന്ന്​ പൊലീസ്​ പറഞ്ഞു. ചൊവ്വാഴ്​ച രാവിലെ വീട്ടുപണിക്കെത്തിയ ആൾ വീടിന്​ പ്രധാനവാതിൽ തുറന്നുകിടക്കുന്നത്​ കണ്ട്​ ​പരിശോധിച്ചപ്പോഴാണ്​ രണ്ടുമുറികളിലായി ബൻസാലിനെയും മകനെയും മരിച്ച നിലയിൽ കണ്ടെത്തിയത്​.

ബൻസാലി​​െൻറ അറസ്​റ്റിനെ തുടർന്ന്​ ഭാര്യ സത്യബാല ബൻസാലും(58)   മകള്‍ നേഹയും(27) ആത്​മഹത്യ ചെയ്​തിരുന്നു. ജൂലൈ 19 ന്​ ഇവരെ ഡല്‍ഹിയിലെ വസതിയിൽ തൂങ്ങിമരിച്ച നിലയില്‍ കണ്ടെത്തുകയായിരുന്നു. സി.ബി.ഐ. വീട്​ റെയ്ഡ് ചെയ്തതിലും ഭർത്താവി​​െൻറ അറസ്​റ്റിലും മനംനൊന്താണ് ആത്മഹത്യ ചെയ്തതെന്ന് സൂചിപ്പിച്ച രണ്ട് ആത്മഹത്യാക്കുറിപ്പുകളും പൊലീസ് കണ്ടെടുത്തിരുന്നു.

ഒരു പ്രമുഖ ഫാർമസ്യൂട്ടിക്കൽ കമ്പനിയെ കേസില്‍ നിന്ന് ഒഴിവാക്കാനായി 9 ലക്ഷം രൂപ കോഴ വാങ്ങിയ കേസിലാണ്​ ബൻസാൽ അറസ്റ്റിലായത്​.
മുംബൈ ആസ്ഥാനമാക്കി പ്രവര്‍ത്തിക്കുന്ന കമ്പനിക്കെതിരെയുള്ള അനധികൃത ഇടപാട്​ കേസില്‍ നിന്നൊഴിവാക്കാനായി 20 ലക്ഷം രൂപ ബൻസാൽ ആവശ്യപ്പെട്ടിരുന്നതായാണ് സി.ബി.​െഎ കണ്ടെത്തിയത്​. തുടർന്ന്​ സി.ബി.​െഎ ജൂലൈ 16 ന്​  എട്ടുകേന്ദ്രങ്ങളിൽ ഒരേസമയം നടത്തിയ റെയ്​ഡിൽ ബൻസാലിനെ അറസ്​റ്റു ചെയ്യുകയായിരുന്നു. കേസുമായി ബന്ധപ്പെട്ട്​ 25 കാരനായ മകനെ സി.ബി.ഐ ചോദ്യംചെയ്​തിരുന്നു.