ബഹ്​റൈൻ പ്രധാനമന്ത്രി വാക്ക്​ പാലിച്ചു, ദനാ മാജിക്ക്​ പാരിതോഷികം നൽകി

ബഹ്​റൈൻ: ഒഡിഷയില്‍ ഭാര്യയുടെ മൃതദേഹം ചുമന്ന് 10 കിലോമീറ്ററോളം നടന്ന ദനാ മാജിക്ക് ബഹ്റൈന്‍ പ്രധാനമന്ത്രി വാഗ്ദാനം ചെയ്ത സഹായം ലഭിച്ചു. ബഹ്റൈന്‍ പ്രധാനമന്ത്രി ഖലീഫ ബിന്‍ സല്‍മാന്‍ അല്‍ഖലീഫ രാജകുമാരനാണ് മാജിക്ക്​ സഹായം നല്‍കിയത്. ദനാ മാജിയുടെ ഇൗ സംഭവം ലോക മനസാക്ഷിയുടെ മുന്നിൽ ഇടം പിടിച്ചിരുന്നു. ഇത്​ ശ്രദ്ദയിൽ പെട്ടതോട്​ കൂടിയാണ്​ ബഹ്​റൈൻ പ്രധാനമന്ത്രി സഹായവുമായെത്തിയത്​. ന്യൂഡൽഹിയിലെ ബഹ്​റൈൻ എംബസിയിൽ നിന്ന്​ 8.9 ലക്ഷം രൂപയുടെ ചെക്ക്​ മാജി കൈപറ്റി. കഴിഞ്ഞ മാസം ആഗസ്​റ്റ്​ 24 നാണ്​ മാജിയുടെ ഭാര്യ ടി.ബി ബാധിച്ച്​ മരണപ്പെട്ടത്​.

ഞാൻ ഇപ്പോൾ സന്തോഷവാനാണെന്നും ഇൗ തുക മക്കളുടെ വിദ്യാഭ്യാസത്തിനായി ചെലവഴിക്കുമെന്നും മാജി പറഞ്ഞു. ബഹ്​റൈൻ പ്രധാനമന്ത്രിയുടെ സഹായത്തിന്​ പുറമേ ജില്ലാ ഭരണകാര്യാലയത്തിൽ നിന്നും 7,5000 ലഭിച്ചിരുന്നു. ബഹ്​റൈൻ പ്രധാനമന്ത്രിയുടെ തുക ലഭിച്ച ഉടനെ തന്നെ ഭൂവനേശ്വറിലെ ഗോത്ര വിഭാഗക്കാർക്കുള്ള കലിംഗ ഇൻസ്​റ്റിറ്റ്യൂട്ട്​ ഒാഫ്​ സോഷ്യൽ സ്​റ്റഡീസിൽ മൂന്ന്​ മക്കളെ ചേർക്കുകയും ചെയ്​ത​ു. ചാന്ദിനി (13), സോനേയ്​ (7), ​പ്രമീള (4) എന്നിവരാണ്​ മക്കൾ.