സംഘർഷം നിയന്ത്രിക്കുന്നതിൽ കശ്​മീർ സർക്കാർ പരാജയം –സർവകക്ഷിസംഘം

ന്യൂഡൽഹി: ജമ്മു കശ്​മീരിലെ സംഘർഷം കൈകാര്യം ചെയ്യുന്നതിൽ സംസ്ഥാന സർക്കാർ പരാജയപ്പെ​െട്ടന്ന്​ സർവകക്ഷി സംഘം. കശ്​മീരിലെ രാഷ്​ട്രീയ നേതാക്കൾ തെറ്റിദ്ധരിപ്പിക്കുന്ന പ്രസ്​താവനകൾ നടത്തിയതാണ്​ പ്രശ്​നം വഷളാക്കിയതെന്നും സർവകക്ഷി സംഘം ആരോപിക്കുന്നു. കശ്​മീരിൽ സന്ദർശനം നടത്തിയ ​സർവകക്ഷി സംഘത്തി​െൻറ കണ്ടെത്തലുകൾ കേന്ദ്ര ആഭ്യന്തരമന്ത്രി രാജ്​നാഥ്​ സിങ്ങി​െൻറ അധ്യക്ഷതയിൽ ഡൽഹിയിൽ നടന്നുകൊണ്ടിരിക്കുന്ന യോഗത്തിലാണ്​ ചർച്ച ചെയ്യുന്നത്​. കശ്​മീരിലെ സംഘർഷം പരിഹരിക്കാനുള്ള ഭാവി പദ്ധതികൾ ആസൂത്രണം ചെയ്യാനാണ്​ യോഗം ചേരുന്നത്​.

ആഭ്യന്തര മന്ത്രി രാജ്നാഥ് സിങ്, ധനമന്ത്രി അരുണ്‍ ജെയ്റ്റ്ലി എന്നിവര്‍ നയിച്ച പാര്‍ലമെൻറി​െൻറ സര്‍വകക്ഷി സംഘത്തില്‍നിന്നുള്ളവരെ കാണാന്‍ കൂട്ടാക്കാതിരുന്ന കശ്മീരിലെ വിഘടനവാദികള്‍ക്കെതിരെ കേന്ദ്ര സര്‍ക്കാര്‍ നിലപാട് കടുപ്പിച്ചേക്കുമെന്നും റിപ്പോർട്ടുണ്ട്​.  കശ്​മീരിൽ കടുത്ത നടപടികൾ സ്വീകരിക്കുന്നതിന്​​ ​സർവകക്ഷി സംഘത്തിലെ എംപിമാരുടെ പിന്തുണ നേടാനും സർക്കാർ ശ്രമിക്കുന്നുണ്ട്​. വിഘടന വാദി നേതാക്കളെ ഒറ്റപ്പെടുത്താനും അവർക്ക്​ നൽകിയിരുന്ന സുരക്ഷ പിൻവലിക്കാനുമാണ്​ നീക്കം.

ഞായറാഴ്​ചയാണ്​ 20 രാഷ്​ട്രീയ പാർട്ടികളിൽ നിന്നുള്ള 26 എംപിമാരടങ്ങിയ സർവകക്ഷി സംഘം കശ്​മീരിൽ രണ്ടു ദിവസത്തെ സന്ദർശനം നടത്തിയത്​. സംഘവുമായി കൂടിക്കാഴ്ചക്ക് വിഘടനവാദി നേതാക്കളെ കേന്ദ്ര-സംസ്ഥാന സര്‍ക്കാറുകള്‍ ഒൗദ്യോഗികമായി ക്ഷണിച്ചിരുന്നില്ല. സ്വന്തംനിലക്ക് ഗീലാനിയെ കാണാന്‍ വസതിക്കുമുന്നില്‍ എത്തിയ സി.പി.എം ജനറല്‍ സെക്രട്ടറി സീതാറാം യെച്ചൂരിയെയും മറ്റും കൂടിക്കാഴ്ചക്ക് തയാറാകാതെ തിരിച്ചയക്കുകയായിരുന്നു.  ചൊവ്വാഴ്​ച ആഭ്യന്തരമന്ത്രി രാജ്നാഥ് സിങ് നരേന്ദ്ര മോദിയെ കശ്മീര്‍ യാത്രാവിവരങ്ങള്‍ ധരിപ്പിച്ചിരുന്നു.

സർവകക്ഷി സംഘത്തി​​െൻറ നിർദേശങ്ങൾ

• സൗത്ത്​ കശ്​മീരിലെ ഗ്രാമപ്രദേശങ്ങളിലാണ്​ സംഘർഷം കൂടുതൽ. ക്രമസമാധാന പ്രശ്​നങ്ങൾ സൃഷ്​ടിക്കാൻ തെരുവിൽ ഇറങ്ങുന്നവരെ നിയന്ത്രിക്കണം. അതേസമയം സമാധാനപരമായ ​പ്രതിഷേധങ്ങൾ തടയരുത്​.
• ജനജീവിതം സാധാരണ നിലയിലാക്കാൻ കർഫ്യൂ പിൻവലിക്കണം, സ്​കൂളുകൾ തുറക്കണം. സംഘർഷത്തിൽ കൊല്ലപ്പെട്ടവർക്ക്​ റിലീഫ്​ പാക്കേജ്​ അനുവദിക്കണം.
• പെല്ലറ്റ്​ തോക്കി​െൻറ ഉപയോഗം അവസാനിപ്പിക്കണം. പെല്ലറ്റ്​ ഉപയോഗം മൂലം പരിക്കേറ്റവർക്ക്​ നഷ്​ടപരിഹാരം അനുവദിക്കണം.