കേന്ദ്രഭരണ പ്രദേശം: ഡല്‍ഹി സര്‍ക്കാര്‍ സുപ്രീംകോടതിയില്‍

ന്യൂഡല്‍ഹി: ഡല്‍ഹി കേന്ദ്രഭരണ പ്രദേശമാണെന്ന ഹൈകോടതി വിധി ചോദ്യംചെയ്ത് സംസ്ഥാന സര്‍ക്കാര്‍  ആറ് പ്രത്യോകാനുമതി ഹരജികള്‍ സുപ്രീംകോടതിയില്‍ സമര്‍പ്പിച്ചു. അതേ സമയം, ഡല്‍ഹി പൂര്‍ണമായും സംസ്ഥാനമാണെന്ന് പ്രഖ്യാപിക്കണമെന്ന ഹരജി സുപ്രീംകോടതിയില്‍നിന്ന് പിന്‍വലിച്ചു. ജസ്റ്റിസുമാരായ എ.കെ. സിക്രി, ബി.വൈ. ചന്ദ്രചൂഡ് എന്നിവരടങ്ങുന്ന ബെഞ്ചാണ് ആപ് സര്‍ക്കാര്‍ നേരത്തെ സമര്‍പ്പിച്ച അപ്പീല്‍ പിന്‍വലിക്കാന്‍ അനുമതിനല്‍കിയത്.

ഡല്‍ഹി കേന്ദ്രഭരണ പ്രദേശമാണെന്നും  ഭരണത്തലവന്‍ ലെഫ്. ഗവര്‍ണറാണന്നുമുള്ള ഹൈകോടതി വിധിക്കെതിരെയാണ് സര്‍ക്കാര്‍ അപ്പീല്‍ നല്‍കിയത്. ഡല്‍ഹി സര്‍ക്കാറിന് വേണ്ടി മുതിര്‍ന്ന അഭിഭാഷക ഇന്ദിര ജെയ്സിങ് ഹാജരായി. അപ്പീലിന് സമാനമായ ആവശ്യങ്ങളാണ് പ്രത്യോകാനുമതി ഹരജികളിലും പറയുന്നതെന്ന് ചൂണ്ടിക്കാട്ടിയാണ് അപ്പീല്‍ പിന്‍വലിച്ചത്.