ലാത്തൂരില്‍ റെയില്‍വേ നല്‍കിയത് 6.20 കോടി ലിറ്റര്‍ വെള്ളം; ബില്‍ നാല് കോടി

മുംബൈ: കടുത്ത വരള്‍ച്ച നേരിട്ട ലാത്തൂരില്‍ ഇന്ത്യന്‍ റെയില്‍വേയുടെ ‘ജലതീവണ്ടി’യില്‍ എത്തിച്ചത് 6.20 കോടി ലിറ്റര്‍ വെള്ളം. വെള്ളം എത്തിക്കുന്നതിനായി ചെലവായ നാല് കോടി രൂപയുടെ ബില്‍ ലാത്തൂര്‍ കലക്ടര്‍ക്ക് അയച്ചതായി സെന്‍ട്രല്‍ റെയില്‍വേ ജനറല്‍ മാനേജര്‍ എസ്.കെ. സൂദ് പറഞ്ഞു. അധികൃതരുടെ നിര്‍ദേശപ്രകാരമാണ് ബില്‍ കലക്ടര്‍ക്ക് അയച്ചതെന്നും തുക അടക്കുന്നതില്‍നിന്ന് ഒഴിവാക്കാന്‍ ജില്ലാ ഭരണകൂടത്തിന് നിയമപരമായി നീങ്ങാമെന്നും അദ്ദേഹം അറിയിച്ചു.

‘ജലദൂത്’ എന്ന് പേരിട്ട  ജലതീവണ്ടി മഹാരാഷ്ട്രയിലെ മിറാജില്‍നിന്ന് ഏപ്രില്‍ 11നാണ് ഓടിത്തുടങ്ങിയത്. 342 കിലോമീറ്ററുകള്‍ ദൂരം താണ്ടിയ ‘ജലദൂത്’ ഏപ്രില്‍ 12ന് ലാത്തൂരിലത്തെി. 10 വാഗനുള്ള ജലതീവണ്ടി ഒമ്പത് തവണ ലാത്തൂരിലത്തെിയിരുന്നു. 50 വാഗനുള്ള തീവണ്ടി 25 ലക്ഷം ലിറ്റര്‍ വെള്ളമാണ് എത്തിച്ചത്. രാജസ്ഥാനിലെ കോട്ടയില്‍നിന്നാണ് ഈ വെള്ളം ശേഖരിച്ചത്. 943 ഗ്രാമങ്ങളുള്ള ലാത്തൂരില്‍ 18 ലക്ഷത്തോളം ജനങ്ങളാണ് വസിക്കുന്നത്.