ഞായറാഴ്ച നടത്താനിരുന്ന കര്‍ണാടക മെഡിക്കല്‍, ഡെന്‍റല്‍ പരീക്ഷകള്‍ റദ്ദാക്കി

ബംഗളൂരു: കര്‍ണാടകയിലെ സ്വകാര്യ മെഡിക്കല്‍, ഡെന്‍റല്‍ കോളേജുകളിലേക്ക് ഞായറാഴ്ച നടത്താനിരുന്ന കോമഡ്കെ പ്രവേശ പരീക്ഷകള്‍ (കണ്‍സോര്‍ഷ്യം ഓഫ് മെഡിക്കല്‍, എന്‍ജിനീയറിങ് ആന്‍ഡ് ഡെന്റല്‍ കോളേജസ് ഓഫ് കര്‍ണാടക അണ്ടര്‍ഗ്രാജുവേറ്റ് എന്‍ട്രന്‍സ് ടെസ്റ്റ്) സുപ്രീംകോടതി ഉത്തരവിനെ തുടര്‍ന്ന് റദ്ദാക്കി. അതേസമയം സ്വകാര്യ എന്‍ജിനീയറിങ് കോളേജുകളിലേക്കുള്ള പ്രവേശനപരീക്ഷ അറിയിച്ചപ്രകാരം നടക്കും.

യു.ജി.ഇ.ടി. പരീക്ഷകള്‍ക്കായി അപേക്ഷിച്ചിരിക്കുന്ന 1.79 ലക്ഷം വിദ്യാര്‍ഥികളില്‍, 1.01 ലക്ഷം വിദ്യാര്‍ഥികളും മെഡിക്കല്‍, ഡെന്റല്‍ സീറ്റുകള്‍ക്കു വേണ്ടിയാണ് അപേക്ഷിച്ചിരിക്കുന്നത്. 12 മെഡിക്കല്‍ കോളേജുകളിലും 19 ഡെന്‍റല്‍ കോളേജുകളിലുമായി 708 മെഡിക്കല്‍-ഡെന്‍റല്‍ സീറ്റുകളാണുള്ളത്. സുപ്രീംകോടതി ഉത്തരവിനെ തുടര്‍ന്ന് ഞായറാഴ്ച 161 എന്‍ജിനീയറിങ് കോളേജുകളിലേക്കായി 18,000 സീറ്റുകള്‍ക്കുവേണ്ടി മാത്രമായിരിക്കും പരീക്ഷ നടക്കുക.