കെജ്രിവാളിന്‍െറ കാറിനുനേരെ ആക്രമണം

ഛണ്ഡിഗഢ്: പഞ്ചാബിലെ ലുധിയാനയില്‍ ഡല്‍ഹി മുഖ്യമന്ത്രി അരവിന്ദ് കെജ്രിവാളിന്‍െറ കാറിനു നേരെ ആക്രമണം. ട്വിറ്ററിലൂടെയാണ് ആക്രമണ വിവരം കെജ്രിവാള്‍ അറിയിച്ചത്. അഞ്ചു ദിവസം നീണ്ടു നില്‍ക്കുന്ന ആം ആദ്മി പാര്‍ട്ടിയുടെ പ്രചരണാര്‍ഥം പഞ്ചാബില്‍ എത്തിയതായിരുന്നു അദ്ദേഹം.

കെജ്രിവാളിനെ അപകടപ്പെടുത്തുകയായിരുന്നു അക്രമികളുടെ ലക്ഷ്യമെന്നും ദൈവാനുഗ്രഹത്താല്‍ അദ്ദേഹം രക്ഷപ്പെടുകയായിരുന്നു എന്നാണ് മറ്റൊരു എ.എ.പി നേതാവ് ആശിഷ് കേതന്‍ ട്വീറ്റ് ചെയ്തിരിക്കുന്നത്. വടിയും കല്ലും കൊണ്ടുള്ള ആക്രമണത്തില്‍ കാറിന്‍െറ ചില്ല് തകര്‍ന്നിട്ടുണ്ട്.

വെള്ളിയാഴ്ച ഛണ്ഡിഗഢില്‍ പൊതുസമ്മേളനത്തില്‍ പങ്കെടുത്തപ്പോഴും കെജ്രിവാളിനു നേരേ അകാലിദളിന്‍െറയും ബി.ജെ.പിയുടെയും പ്രവര്‍ത്തകര്‍ പ്രതിഷേധിക്കുകയും കരിങ്കൊടി കാണിക്കുകയും ചെയ്തിരുന്നു. ഈ വര്‍ഷാവസാനം പഞ്ചാബില്‍ നിയമസഭ തെരഞ്ഞെടുപ്പ് നടക്കുകയാണ്.

2014ലെ പാര്‍ലമെന്‍റ് തെരഞ്ഞെടുപ്പില്‍ നാലു സീറ്റ് നേടിയ എ.എ.പി വരുന്ന നിയമസഭ തെരഞ്ഞെടുപ്പില്‍ വന്‍മുന്നേറ്റമാണ് പഞ്ചാബില്‍ ലക്ഷ്യമിടുന്നത്.