ഒഴിവുകഴിവ് പറയുന്നത് നിര്‍ത്തി പണിയെടുക്കണമെന്ന് മോദിയോട് രാഹുല്‍

ന്യൂഡല്‍ഹി: ഒഴിവുകഴിവ് പറയുന്നത് അവസാനിപ്പിച്ച് പ്രധാനമന്ത്രി പണിയെടുക്കണമെന്ന് കോണ്‍ഗ്രസ് ഉപാധ്യക്ഷന്‍ രാഹുല്‍ ഗാന്ധി. പ്രധാനമന്ത്രിയുടെ ജോലി രാജ്യത്തെ നയിക്കുകയാണ്. അല്ലാതെ ഒഴിവുകഴിവ് നിരത്തുകയല്ല. കോണ്‍ഗ്രസ് പാര്‍ലമെന്‍റ് പ്രവര്‍ത്തിക്കാന്‍ അനുവദിക്കുന്നില്ളെന്ന മോദിയുടെ പരാമര്‍ശത്തിനെതിരെ പ്രതികരിക്കുകയായിരുന്നു രാഹുല്‍. 18 മാസമായി രാജ്യത്ത് എന്തുകൊണ്ട് സാമ്പത്തിക വളര്‍ച്ചയുണ്ടാകുന്നില്ല, കര്‍ഷകര്‍ക്ക് എന്തുകൊണ്ട് കുടിശ്ശിക ലഭിക്കുന്നില്ല, തൊഴിലാളികള്‍ക്ക് എന്തുകൊണ്ട് അര്‍ഹിക്കുന്ന ആനുകൂല്യം ലഭിക്കുന്നില്ല തുടങ്ങിയ ന്യായങ്ങള്‍ നിരത്തുകയാണ് പ്രധാനമന്ത്രി. എന്നാല്‍, ഇത്തരം ഒഴിവുകഴിവ് പറയാനല്ല ജനങ്ങള്‍ അദ്ദേഹത്തെ തെരഞ്ഞെടുത്ത് പാര്‍ലമെന്‍റിലേക്ക് അയച്ചതെന്നും രാഹുല്‍ പറഞ്ഞു.