പത്താന്‍കോട്ട് ആക്രമണം: പാകിസ്താനില്‍ എന്‍.ഐ.എയെ തെളിവെടുക്കാന്‍ അനുവദിച്ചേക്കും

ന്യൂഡല്‍ഹി: പത്താന്‍കോട്ട് ഭീകരാക്രമണം സംബന്ധിച്ച അന്വേഷണത്തിന്‍െറ ഭാഗമായി പാകിസ്താനില്‍ തെളിവെടുപ്പു നടത്താന്‍ ദേശീയ അന്വേഷണ ഏജന്‍സിക്ക് (എന്‍.ഐ.എ) അനുമതി നല്‍കുന്നത് പാകിസ്താന്‍ പരിഗണിച്ചേക്കുമെന്ന് പാക് പ്രധാനമന്ത്രിയുടെ വിദേശകാര്യ ഉപദേഷ്ടാവ് സര്‍താജ് അസീസ്. അത്തരമൊരു സാഹചര്യമുണ്ടാവുകയും ഇന്ത്യ ആവശ്യമുന്നയിക്കുകയും ചെയ്താല്‍ എന്‍.ഐ.എക്ക് അനുമതി നല്‍കുന്നത് പരിഗണിക്കുമെന്ന് അദ്ദേഹം ടെലിവിഷന്‍ ചാനലിന് നല്‍കിയ അഭിമുഖത്തില്‍ പറഞ്ഞു. ഇരു രാജ്യങ്ങളുടെയും സമാധാന ചര്‍ച്ചകള്‍ മരവിപ്പിച്ച നിലയിലാണെന്ന് കഴിഞ്ഞദിവസം പാക് ഹൈകമീഷണര്‍ അബ്ദുല്‍ ബാസിത് പറഞ്ഞിരുന്നു. എന്നാല്‍, ചര്‍ച്ച റദ്ദാക്കിയെന്നോ ഉപേക്ഷിച്ചെന്നോ അല്ല അദ്ദേഹം അര്‍ഥമാക്കിയതെന്നും വൈകാതെ ചര്‍ച്ച പുനരാരംഭിക്കുമെന്നാണ് താന്‍ പ്രതീക്ഷിക്കുന്നതെന്നും സര്‍താജ് അസീസ് പറഞ്ഞു.