ഫേസ്ബുക് പോസ്റ്റിലെ സര്‍ക്കാര്‍ ഇടപെടല്‍: മുന്നില്‍ ഇന്ത്യ

ന്യൂഡല്‍ഹി: സര്‍ക്കാറുകളുടെ ഇടപെടല്‍മൂലം നീക്കേണ്ടി വന്ന ഫേസ്ബുക് പോസ്റ്റുകളുടെ എണ്ണത്തില്‍ വന്‍ വര്‍ധന. ഏറ്റവും കൂടുതല്‍ നീക്കിയതാവട്ടെ ഇന്ത്യയിലും.  ഈ വര്‍ഷത്തിന്‍െറ ഒന്നാം പാതിയില്‍ 20,568 പോസ്റ്റുകളാണ് നിയമങ്ങള്‍ക്ക് വിരുദ്ധമെന്നും പ്രശ്നകാരണമെന്നും ചൂണ്ടിക്കാട്ടി  വിവിധ രാജ്യങ്ങളിലെ ഭരണകൂടങ്ങള്‍ ഇടപെട്ടതുമൂലം നീക്കേണ്ടിവന്നത്. ഇതിന്‍െറ മുക്കാല്‍ പങ്കും ഇന്ത്യയിലാണ്- സ്റ്റാറ്റസുകളും ചിത്രങ്ങളും വിഡിയോകളുമടക്കം 15,155  എണ്ണം. തുര്‍ക്കിയാണ് രണ്ടാം സ്ഥാനത്ത്- 4,496.
ഉപഭോക്താക്കളുടെ രഹസ്യവിവരം തേടിയുള്ള സര്‍ക്കാറുകളുടെ സമ്മര്‍ദം വര്‍ധിച്ചതായും വാര്‍ഷിക റിപ്പോര്‍ട്ടില്‍ ഫേസ്ബുക് വ്യക്തമാക്കുന്നു.  41,214 പേരുടെ വിവരങ്ങളാണ് ഈ വര്‍ഷം ആദ്യം തേടിയത്.  അമേരിക്കന്‍ അന്വേഷണ ഏജന്‍സികളാണ് ഇതില്‍ 60 ശതമാനത്തിന്‍െറയും ആവശ്യക്കാര്‍. ഫ്രാന്‍സ്, ബ്രിട്ടന്‍, ജര്‍മനി എന്നീ രാജ്യങ്ങളും കൂടുതല്‍ വിവരം തേടിയവരുടെ പട്ടികയിലുണ്ട്. പിന്‍വാതില്‍ വഴി വിവരങ്ങള്‍ നല്‍കാറില്ളെന്നും ഭരണകൂടങ്ങള്‍ക്ക് നേരിട്ട് ഇടപെടാന്‍ അവസരം നല്‍കില്ളെന്നുമാണ് ഫേസ്ബുക് അവകാശവാദം.