കർഷക സമരത്തിനിടെ 'ശഹീദാ'യത്​ 20 പേർ; ബുധനാഴ്​ച ഡൽഹി - നോയിഡ ഹൈവേ ഉപരോധിക്കും

ന്യൂഡൽഹി: കേന്ദ്രവുമായുള്ള ചർച്ചകളിൽനിന്ന് ഒളിച്ചോടില്ലെന്നും സമരം കൂടുതൽ ശക്​തമാക്കുമെന്നും​ വിവിധ കർഷക സംഘടന നേതാക്കൾ അറിയിച്ചു. ബുധനാഴ്​ച ഡൽഹി - നോയിഡ ഹൈവേ പൂർണമായും തടയും.​ സമരത്തിനിടെ ഇതുവരെ 20ഓളം കർഷകരാണ്​ ശഹീദായത്​​ (രക്​തസാക്ഷി). 20 ദിവസമായി സമരം തുടങ്ങിയിട്ട്​. എല്ലാ ദിവസവും ഓരോ കർഷകൻ വീതം മരിച്ചുവീഴുകയാണ്​. എന്നാൽ, കാർഷിക നിയമങ്ങൾക്കെതിരായ പോരാട്ടം വിജയം നേടുംവരെ തുടരുമെന്നും കർഷക നേതാക്കൾ സിങ്കു ബോർഡറിൽ നടത്തിയ വാർത്തസമ്മേളനത്തിൽ പറഞ്ഞു.

അതേസമയം, കർഷകർക്കായി തയാറാക്കിയ മൂന്ന്​ നിയമങ്ങൾക്കെതിരെ പ്രക്ഷോഭം ഉയരാൻ കാരണം അവരെ ​പ്രതിപക്ഷം തെറ്റിദ്ധരിപ്പിച്ചതിനാലാണെന്ന്​ ​പ്രധാനമന്ത്രി നരേന്ദ്ര മോദി കുറ്റപ്പെടുത്തി. ചൊവ്വാഴ്​ച ഗുജറാത്തിലെ വിവിധ വികസന പ്രവർത്തനങ്ങൾ ഉദ്​ഘാടനം നിർവഹിച്ച്​ സംസാരിക്കുകയായിരുന്നു അദ്ദേഹം.

സമരത്തിന്​ പിന്നിൽ ഗൂഢാലോചനയുണ്ടായിട്ടുണ്ട്​. കർഷകരുടെ ഭൂമി കോർപറേറ്റുകൾ പിടിച്ചെടുക്കുമെന്നാണ്​ ഇവർ പറയുന്നത്​. കർഷകരുടെ പാൽ വാങ്ങുന്നവർ പശുവിനെ കൊണ്ടുപോകുന്നുണ്ടോ? എന്തിനാണ്​ പ്രതിപക്ഷം കർഷകരെ തെറ്റിദ്ധരിപ്പിക്കുന്നത്​ - പ്രധാനമന്ത്രി ചോദിച്ചു. നിയമവുമായി ബന്ധപ്പെട്ട ആശങ്കകൾ കർഷകരുമായി ചർച്ച ചെയ്​ത്​ പരിഹരിക്കുമെന്നും മോദി പറഞ്ഞു.

അതേസയമം, മൂന്ന് നിയമങ്ങളും നിരുപാധികം റദ്ദാക്കണമെന്നാണ്​ കർഷകരുടെ ആവശ്യം. ചർച്ച തുടരാനും ഭേദഗതി വരുത്താനും തയാറാണെന്നും എന്നാൽ, നിയമങ്ങൾ റദ്ദാക്കില്ലെന്നുമാണ്​ സർക്കാർ പറയുന്നത്​. കൂടാതെ കർഷകരുടെ ആശങ്കകളെ അടിസ്ഥാനമാക്കി മൂന്ന് നിയമങ്ങളുടെ പേര്​ മാറ്റാൻ സന്നദ്ധമാണെന്നും സർക്കാർ വൃത്തങ്ങൾ അറിയിക്കുന്നു.

ഡൽഹി അതിർത്തിയിൽ സമരക്കാരുടെ എണ്ണം ദിവസവും വർധിച്ചുകൊണ്ടിരിക്കുകയാണ്​. നിലവിൽ 60,000 പേർ ഇവിടെ തമ്പടിച്ചിട്ടുണ്ടെന്നാണ്​ പൊലീസ്​ പറയുന്നത്​. കൂടുതൽ ആളുകളെ പ്രവേശിപ്പിക്കാനാവില്ലെന്നും പൊലീസ്​ പറയുന്നു. എന്നാൽ, ഇതിൽ കൂടുതൽ ആളുകളുണ്ടെന്നാണ്​ കർഷക നേതാക്കളുടെ വിശദീകരണം. സമരത്തിൽ പങ്കുചേരാൻ പഞ്ചാബിലെ വിദൂര പ്രദേശങ്ങൾക്ക്​ പുറമെ ഹരിയാന, മധ്യപ്രദേശ്​, യു.പി എന്നിവയടക്കം രാജ്യത്തി​െൻറ വിവിധ ഭാഗങ്ങളിൽനിന്നും കർഷകർ വന്നുകൊണ്ടിരിക്കുകയാണ്​.