ദലിത്​ കുടുംബത്തിലെ രണ്ട്​ വയസ്സുള്ള കുഞ്ഞ്​ ക്ഷേത്രത്തിനുള്ളിൽ കയറി; പിഴയായി ആവശ്യപ്പെട്ടത്​ 25,000 രൂപ

ബംഗളൂരു: കർണാടകയിൽ ദലിത്​ കുടുംബത്തിലെ രണ്ട്​ വയസ്സുള്ള ആൺകുഞ്ഞ്​ ക്ഷേത്രത്തിനുള്ളിൽ കയറിയതിന്​ 25,000 രൂപ പിഴ ആവശ്യപ്പെട്ട്​ ക്ഷേത്ര ഭരണസമിതി. ക്ഷേത്രത്തിൽ ശുദ്ധികലശം നടത്താനാണ്​ ഈ തുക ആവശ്യ​പ്പെട്ടത്​. കൊപ്പാൾ ജില്ലയിലെ മിയാപുർ ഗ്രാമത്തിലാണ്​ സംഭവം. കുഞ്ഞിന്‍റെ കുടുംബം പൊലീസിനെയും ജില്ലാ ഭരണകൂടത്തെയും അറിയിച്ചതനുസരിച്ച്​ അധികൃതർ ഇടപെട്ടതോടെ ക്ഷേത്ര ഭരണസമിതി പിഴ ഒഴിവാക്കി കൊടുത്തെന്ന്​ 'ഇന്ത്യ ട​ുഡേ' റി​േപ്പാർട്ട്​ ചെയ്യുന്നു.

സെപ്​റ്റംബർ നാലിനായിരുന്നു സംഭവം. ജന്മദിനത്തിൽ​ പ്രാർഥിക്കുന്നതിന്​ വേണ്ടിയാണ്​ കുഞ്ഞിന്‍റെ കുടുംബം വീടിന്​ മുന്നിലുള്ള ആഞ്​ജനേയ ക്ഷേത്രത്തിന്​ മുമ്പിലെത്തിയത്​. ദലിതുകൾക്ക്​ ഈ മേഖലയിലെ പല ക്ഷേത്രങ്ങളിലും പ്രവേശനം നിഷേധിക്കപ്പെട്ടിരിക്കുന്നതിനാൽ ​വെളിയിൽ നിന്നാണ്​ പ്രാർഥിക്കാറ്​. പെട്ടന്ന്​ മഴ പെയ്​തപ്പോൾ കുഞ്ഞ്​ ക്ഷേത്രത്തിനുള്ളിലേക്ക്​ ഓടിക്കയറുകയായിരുന്നു എന്ന്​ പിതാവ്​ ചന്ദ്രു പറയുന്നു.

അപ്പോൾ പൂജാരിയും മറ്റ്​ ക്ഷേത്ര ഭരണസമിതി ഭാരവാഹികളും എത്തി ശുദ്ധികലശം നടത്തുന്നതിന്​ 25,000 രൂപ പിഴയൊടുക്കണമെന്ന്​ ആവശ്യപ്പെട്ടു. തുടർന്ന്​ ചന്ദ്രു ഉൾപ്പെടുന്ന ഛന്നദാസർ വിഭാഗം പ്രക്ഷോഭം നടത്തുകയും പൊലീസിലും ജില്ലാ ഭരണകൂടത്തിലും വിവരമറിയിക്കുകയുമായിരുന്നു. ഇതനുസരിച്ച്​ അധികൃതരെത്തി ക്ഷേത്രം അധികൃതരുമായി സംസാരിച്ച്​ പ്രശ്​നം പരിഹരിച്ചു. ഗ്രാമത്തിന്‍റെ സമാധാന അന്തരീക്ഷം നിലനിർത്തുന്നതിനായി പൊലീസിൽ പരാതി നൽകുന്നതിൽ നിന്ന്​ ചന്ദ്രുവും കുടുംബവും പിന്മാറുകയും ചെയ്​തു.