ലോക്ക്​ഡൗൺ നടപ്പാക്കുന്നതിൽ വീഴ്​ച; ഡൽഹിയിലെ രണ്ട്​ ഐ.എ.എസുകാർക്ക്​ സസ്​പെൻഷൻ

ന്യൂഡൽഹി: കോവിഡ് -19 വ്യാപനം നിയന്ത്രിക്കുന്നതിനായി പ്രഖ്യാപിച്ച ലോക്ക്ഡൗൺ നടപ്പാക്കുന്നതിൽ പരാജയപ്പെട്ടുവെ ന്നാരോപിച്ച് ഡൽഹി സർക്കാറിലെ രണ്ട് ഉന്നത ഐ‌.എ‌.എസ് ഉദ്യോഗസ്ഥരെ സസ്‌പെൻഡ് ചെയ്തു. കേന്ദ്ര ആഭ്യന്തരമന്ത്രാലയമാണ്​ ഇത്​ സംബന്ധിച്ച ഉത്തരവിറക്കിയത്​.

ഗതാഗതം വകുപ്പിൽ അഡീഷണൽ ചീഫ് സെക്രട്ടറിയായി നിയമിതനായ രേണു ശർമയെയും ഫിനാൻസ് പ്രിൻസിപ്പൽ സെക്രട്ടറിയായി ജോലി ചെയ്​തിരുന്ന രാജീവ് വർമ്മയെയുമാണ്​ സസ്​പെൻഡ്​ ചെയ്​തത്​. 1988 ബാച്ച് ഐ‌.എ‌.എസ് ഉദ്യോഗസ്ഥയായ​ രേണു ശർമയും 1992 ലെ ബാച്ച് ഐ‌.എ‌.എസ് ഉദ്യോഗസ്ഥനായ രാജീവ്​ വർമയും ലോക്​ഡൗൺ സംബന്ധിച്ച ഉത്തരവുകൾ നടപ്പാക്കുന്നതിൽ വീഴ്​ച വരുത്തിയെന്നാണ്​ ആരോപണം. ഇവർക്കെതിരെ പിഴ ചുമത്തുമെന്നും ആഭ്യന്തര മന്ത്രാലയം അറിയിച്ചു.

ഡൽഹി അഡീഷ്​ണൽ ചീഫ്​ സെക്രട്ടറിക്കും ഹോം ആൻറ്​ ലാൻഡ്​ ബിൽഡിങ്​ സെക്രട്ടറിക്കും സീലാംപൂരിലെ സബ്​ ഡിവിഷണൽ മജിസ്​ട്രേറ്റിനു​ം എതിരെ നടപടിയുണ്ടാകുമെന്നും ആഭ്യന്തര മന്ത്രാലയം അറിയിച്ചിട്ടുണ്ട്​.

ഉദ്യോഗസ്ഥർക്കെതിരായ നടപടിയു​ടെ കാരണം ആഭ്യന്തര മന്ത്രാലയം അധികൃതർ കൃതമായി വിശദീകരിച്ചിട്ടില്ല. കഴിഞ്ഞ രണ്ട് ദിവസമായി തലസ്ഥാനത്തിൻെറ വിവിധ ഭാഗങ്ങളിൽ നിന്ന് ഡൽഹി-യു.പി അതിർത്തിയിലേക്ക് കുടിയേറ്റ തൊഴിലാളികളെ എത്തിക്കാനുള്ള ഡൽഹി ട്രാൻസ്പോർട്ട് കോർപ്പറേഷൻെറ ക്രമീകരണങ്ങളിൽ വന്ന വീഴ്​ചയെ തുടർന്നാണ്​ നടപടിയെന്നാണ്​ സൂചന.