തിഹാർ ജയിലിൽ സംഘർഷം; ഹിസ്​ബ്​ നേതാവി​െൻറ മകനടക്കം 18 പേർക്ക്​ പരിക്ക്​

ന്യൂഡൽഹി: തിഹാർ ജയിലിൽ തടവുകാരും സുരക്ഷജീവനക്കാരും തമ്മിലുണ്ടായ സംഘർഷത്തിൽ തടവുകാരനായ ഹിസ്​ബുൽ മുജാഹിദീൻ പ്രവർത്തകൻ സയ്യിദ്​ ഷാഹിദ്​ യൂസുഫ്​ അടക്കം 18 പേർക്ക്​ പരിക്കേറ്റതായി ജയിൽ അധികൃതർ. ഹിസ്​ബുൽ മുജാഹിദീൻ മേധാവി സയ്യിദ്​ സലാഹുദ്ദീ​​െൻറ മകനാണ്​ ഷാഹിദ്​ യൂസുഫ്​. തീവ്രവാദ ഫണ്ടിങ്ങുമായി ബന്ധപ്പെട്ട കേസിലാണ്​ ഇയാൾ ശിക്ഷ അനുഭവിക്കുന്നത്​.

പതിവുപരിശോധനക്കിടെ മൂന്ന്​ തടവുപുള്ളികൾ തമിഴ്​നാട്ടുകാരനും ഭിന്നശേഷിക്കാരനുമായ ഒാഫിസറെ മർദിച്ചതാണ്​ സംഘർഷത്തിലേക്ക്​ നയിച്ചത്​. മൂന്ന്​ തടവുകാർ അനധികൃതവസ്​തുക്കൾ കൈവശംവെച്ചതായി കണ്ടതിനെതുടർന്ന്​ അത്​ നീക്കാൻ തമിഴ്​നാട്​ സ്​പെഷൽ ഫോഴ്​സ്​ ഇൻസ്​പെക്​ടർ മധു പാണ്ഡെ ശ്രമിച്ചപ്പോൾ ഇവർ ആക്രമിക്കുകയായിരുന്നു. ഇതേതുടർന്നാണ്​ ഷാഹിദ്​ യൂസുഫ്​ അടക്കമുള്ളവർക്ക്​ പരിക്കേറ്റത്​​. അക്രമസംഭവങ്ങളെതുടർന്ന്​ തമിഴ്​നാട്​സംഘത്തെ ജയിലിലെ പ്രധാന ഡ്യൂട്ടികളിൽ നിന്ന്​ മാറ്റിനിർത്തി. 

ഡൽഹി ‘എയിംസി’ൽ നിന്നുള്ള ​ഡോക്​ടർമാരുടെ സംഘം പരിക്കേറ്റവരെ പരിശോധിച്ചു. അക്രമത്തെ സംബന്ധിച്ച്​ തിഹാർ ജയിൽ അധികൃതർ ആഭ്യന്തരമന്ത്രാലയത്തെ അറിയിച്ചു. അന്വേഷണത്തിന്​ ജില്ല ജഡ്​ജിയുടെ റാങ്കിലുള്ള ഒാഫിസറുടെ​ നേതൃത്വത്തിൽ വസ്​തുതാന്വേഷക സംഘത്തെ നിയോഗിച്ചിട്ടുണ്ട്​.