തമിഴ്​നാട്ടിലെ 18 എം.എൽ.എമാരും അയോഗ്യർ തന്നെ

ചെന്നൈ: ടി.ടി.വി. ദിനകരൻ പക്ഷത്തെ 18 എം.എൽ.എമാർക്ക്​ അയോഗ്യത കൽപിച്ച തമിഴ്​നാട്​ നിയമസഭ സ്​പീക്കറുടെ നടപടി ​ മദ്രാസ്​ ഹൈകോടതി ശരിവെച്ചു. സ്​പീക്കറുടെ നടപടി ചോദ്യംചെയ്​ത എം.എൽ.എമാരുടെ ഹരജി തള്ളിയ ഹൈകോടതി 18 നിയമസഭ മണ്ഡലങ്ങളിലും ഉപതെരഞ്ഞെടുപ്പ്​ നടത്താൻ തടസ്സമില്ലെന്നും വ്യക്തമാക്കി. നിയമസഭയിൽ വിശ്വാസ വോ​െട്ടടുപ്പ്​ നടത്താൻ നേര​േത്ത പുറപ്പെടുവിച്ച വിലക്കും നീക്കി. സ്​പീക്കറുടെ അധികാരത്തിൽ ഇടപെടാനാവില്ലെന്നും തീരുമാനം നിയമവിരുദ്ധമല്ലെന്നും ജസ്​റ്റിസ്​ എം. സത്യനാരായണൻ വിധിപ്രസ്​താവത്തിൽ വ്യക്തമാക്കി. കോടതിവിധി എടപ്പാടി പളനിസാമി സർക്കാറിന്​ താൽക്കാലിക ആശ്വാസവും ദിനകരൻപക്ഷത്തിന്​ തിരിച്ചടിയുമായി.

ജൂൺ 14ന്​ ജഡ്​ജിമാർ ഭിന്നവിധി പുറപ്പെടുവിച്ചതോടെ അന്തിമവിധിക്കായി കേസ്​ മൂന്നാമതൊരു ജഡ്​ജിക്ക്​ കൈമാറുകയായിരുന്നു. മദ്രാസ്​ ഹൈകോടതി ചീഫ്​ ജസ്​റ്റിസ്​ ഇന്ദിര ബാനർജി സ്​പീക്കറുടെ നടപടി അംഗീകരിച്ച​േപ്പാൾ ജസ്​റ്റിസ്​ എം. സുന്ദർ വിയോജിക്കുകയായിരുന്നു. തുടർന്നാണ്​ സുപ്രീംകോടതി നിർദേശപ്രകാരം ​ ജസ്​റ്റിസ്​ എം. സത്യനാരായണൻ കേസിൽ വാദംകേട്ടത്​.

ശശികല, ദിനകരൻ എന്നിവരെ അണ്ണാ ഡി.എം.​കെയിൽനിന്ന്​ പുറത്താക്കിയ സാഹചര്യത്തിലാണ്​ 18 എം.എൽ.എമാർ 2017 ആഗസ്​റ്റിൽ അന്നത്തെ ഗവർണർ വിദ്യാസാഗർ റാവുവിനെ സന്ദർശിച്ച്​ മുഖ്യമന്ത്രി എടപ്പാടി പളനിസാമിയിൽ വിശ്വാസം നഷ്​ടപ്പെട്ടതായും പിന്തുണ പിൻവലിക്കുന്നതായും കത്ത്​ നൽകിയത്​. ഇതോടെ അണ്ണാ ഡി.എം.കെ ചീഫ്​ വിപ്പ്​ എസ്​. രാജേന്ദ്രൻ ഇവർ പാർട്ടിവിരുദ്ധ നിലപാട്​ സ്വീകരിച്ചതായി ആരോപിച്ച്​ സ്​പീക്കർക്ക്​ പരാതി നൽകി. ഇതി​​​െൻറ അടിസ്​ഥാനത്തിലാണ്​ 2017 സെപ്​റ്റംബർ 18ന്​ സ്​പീക്കർ അയോഗ്യത കൽപിച്ചത്​.

കോടതിവിധി പ്രതികൂലമായിരുന്നുവെങ്കിൽ എടപ്പാടി സർക്കാറി​​​െൻറ നിലനിൽപ്​ അപകടത്തിലാവുമായിരുന്നു. എന്നാൽ, ഇപ്പോൾ സർക്കാറി​നു​ മുന്നിലെ ഭീഷണി തൽക്കാലം ഒഴിവായി. നിലവിലെ 214 അംഗങ്ങളിൽ കേവല ഭൂരിപക്ഷത്തിന്​ 108 സീറ്റ്​ മതി. അണ്ണാ ഡി.എം.കെക്ക്​ ഇപ്പോൾ സ്​പീക്കറെ കൂടാതെ 109 അംഗങ്ങളുണ്ട്​. ഇവരിൽ സർക്കാറുമായി ഇടഞ്ഞുനിൽക്കുന്ന ആറു എം.എൽ.എമാർക്കും പാർട്ടി വിപ്പ്​ അനുസരിക്കേണ്ടിവരും.

അതേസമയം, തന്നോടൊപ്പമുണ്ടായിരുന്ന 18 എം.എൽ.എമാരുടെ പദവി നഷ്​ടപ്പെട്ടത്​ ദിനകരന്​ തിരിച്ചടിയായി​. ബംഗളൂരു ജയിലിൽ കഴിയുന്ന ശശികലയോടും ടി.ടി.വി. ദിനകരനടക്കം നേതാക്കളുമായും കൂടിയാലോചിച്ച്​ സുപ്രീംകോടതിയിൽ അപ്പീൽ നൽകുന്നത്​ സംബന്ധിച്ച്​ തീരുമാനമെടുക്കുമെന്ന്​ വിമത നേതാവ്​ തങ്കതമിഴ്​ശെൽവൻ അറിയിച്ചു.