ഗൂഡല്ലൂരിൽ അംഗനവാടിയിൽനിന്ന്​ ഉച്ചഭക്ഷണം കഴിച്ച കുട്ടികൾക്ക്​ ഭക്ഷ്യവിഷബാധ; 17പേർ ആശുപത്രിയിൽ

ചെന്നൈ: തമിഴ്​നാട്ടിലെ ഗൂഡല്ലൂരിൽ അംഗനവാടിയിൽ നിന്ന്​ ഉച്ചഭക്ഷണം കഴിച്ച 17 കുട്ടികളെ ഭക്ഷ്യവിഷബാധയെ തുടർന്ന്​ ആശു​പത്രിയിൽ പ്രവേശിപ്പിച്ചു. തിങ്കളാഴ്ചയാണ്​ സംഭവം.

പൂതങ്ങാട്ടി ​ഗ്രാമത്തിലെ അംഗനവാടിയിൽ ഉച്ചഭക്ഷണം കഴിച്ച കുട്ടികൾ ഛർദ്ദിക്കുകയും ബോധക്ഷയം ഉണ്ടാകുകയായിരുന്നു. ഉടൻ തന്നെ കുട്ടികളെ ഗൂഡല്ലൂർ സർക്കാർ ആശുപത്രിയിലെത്തിച്ചു. കുട്ടികൾക്ക്​ നൽകിയ ഭക്ഷണത്തിൽ ചത്ത പല്ലിയുണ്ടായിരുന്നുവെന്നും ഇതാണ്​ ഭക്ഷ്യവിഷബാധക്ക്​ ഇടയാക്കിയതെന്നും മാതാപിതാക്കൾ ആരോപിച്ചു.

തുടർന്ന്​ ജില്ല കലക്​ടർ കെ. ബാലസുബ്രമണ്യം ആശുപത്രിയിലെത്തുകയും മാതാപിതാക്കളോട്​ സംസാരിച്ചു. ഭക്ഷ്യസുരക്ഷ ഉദ്യോഗസ്​ഥരും മറ്റു അധികൃതരും സ്​ഥലത്തെത്തി പരി​േശാധന നടത്തുമെന്നും കുറ്റക്കാക്കെതിരെ കർശന നടപടി സ്വീകരിക്കുമെന്നും കലക്​ടർ മാതാപിതാക്കൾക്ക്​ ഉറപ്പുനൽകി.

രണ്ടുകുട്ടികൾക്ക്​ ചികിത്സ തുടരുമെന്നും മറ്റുള്ളവരെല്ലാം അപകട നില തരണം ചെയ്​തുവെന്നും ഡോക്​ടർമാർ അറിയിച്ചു. സെപ്​റ്റംബർ ഒന്നുമുതൽ കോവിഡ്​ നിയന്ത്രണങ്ങളിൽ ഇളവ്​ അനുവദിച്ചതോടെ വിദ്യാർഥികൾക്ക്​ ഉച്ചഭക്ഷണ പദ്ധതി പുനരാരംഭിച്ചിരുന്നു.