ഗോവയിൽ തിരിച്ചെത്തിയ 154 കപ്പൽ ജീവനക്കാർ നിരീക്ഷണത്തിൽ

പനാജി: ഗോവയിൽ തിരിച്ചെത്തിയ 154 കപ്പൽ ജീവനക്കാ​െര ക്വാറൻറീനിൽ പ്രവേശിപ്പിച്ചതായി മുഖ്യമന്ത്രി പ്രമോദ്​ സാവന്ത്​. വിവിധ കപ്പലുകളിൽ ജോലി ചെയ്ത ശേഷം സംസ്ഥാനത്തെത്തിയ ഗോവക്കാരുടെ രണ്ടാമത്തെ ബാച്ചാണിത്.  ക്രൂയിസ് കപ്പലിൽ ജോലി ചെയ്​തിരുന്ന നൂറോളം ജീവനക്കാർ കഴിഞ്ഞ മാസം സംസ്ഥാനത്തേക്ക് മടങ്ങിയിരുന്നു.

മുംബൈ തുറമുഖത്ത്  നങ്കൂരമിട്ട കപ്പലുകളിൽ നിന്ന്​ 154 ഗോവ സ്വദേശികളെ റോഡ്​ മാർഗം സംസ്ഥാനത്തെത്തിച്ചു. രാജ്യത്തിൻെറ വിവിധ ഭാഗങ്ങളിലും വിദേശരാജ്യങ്ങളിലും കുടുങ്ങിക്കിടക്കുന്ന ഗോവക്കാരെ സുരക്ഷിതമായി തിരിച്ചെത്തിക്കാൻ കേന്ദ്ര വകുപ്പുകളുമായി ഏകോപിപ്പിച്ച് സംസ്ഥാന സർക്കാർ പ്രവർത്തിച്ചുകൊണ്ടിരിക്കുകയാണെന്നും  മുഖ്യമന്ത്രി ട്വീറ്റ്​ ചെയ്​തു. 

കപ്പൽ ജീവനക്കാരെ സർക്കാർ സജീകരിച്ച നിരീക്ഷണ കേന്ദ്രങ്ങളിലാണ്​ താമസിപ്പിക്കുന്നത്​. രോഗബാധിതരല്ലാത്തവരെ 14 ദിവസം ക്വാറൻറീനിൽ താമസിപ്പിക്കുമെന്നും സാവന്ത്​ അറിയിച്ചു. 

ഒരു മാസത്തിലേറെയായി കോവിഡ്​ മുക്തമായ   ഗോവയിൽ കഴിഞ്ഞ ദിവസം എട്ട് പുതിയ കേസുകൾ റിപ്പോർട്ട്​ ചെയ്​തിരുന്നു.  അതിൽ ഒരാൾ  കപ്പൽ ജീവനക്കരനാണ്​. മുംബൈയിൽ 14 ദിവസത്തെ ക്വാറൻറീൻ പൂർത്തിയായക്കിയ കപ്പൽ ജീവനക്കാരന്​ വ്യാഴാഴ്ച ഗോവയിലെത്തിയ ശേഷം കോവിഡ്​ സ്ഥിരീകരിക്കുകയായിരുന്നു.