ആൺസുഹൃത്തുമായുള്ള ചാറ്റിങ്​ ചോദ്യം ചെയ്​ത സഹോദരനെ 15കാരി ഇയര്‍ഫോണ്‍ കഴുത്തില്‍ മുറുക്കി കൊന്നു

റായ്ബറേലി: ആണ്‍സുഹൃത്തുമായി ഏറെ നേരം മൊബൈലില്‍ ചാറ്റുചെയ്​തത്​ ചോദ്യംചെയ്ത ഒമ്പത്​ വയസ്സുള്ള സഹോദരനെ 15 വയസ്സുകാരി ഇയർഫോൺ കഴുത്തിൽ മുറുക്കി കൊന്നു. ഉത്തർപ്രദേശിലെ റായ്​ബറേലിയിലെ ഡൽമൗവിൽ കഴിഞ്ഞ വ്യാഴാഴ്ചയായിരുന്നു സംഭവം. മകനെ അയൽക്കാരൻ അപായപ്പെടുത്തിയതാണെന്ന്​ കാട്ടി ഇവരുടെ മാതാപിതാക്കൾ പൊലീസിൽ പരാതി നൽകിയിരുന്നു.

ഇതനുസരിച്ച്​ പൊലീസ്​ അയൽക്കാരനെ കസ്റ്റഡിയിലെടുക്കുകയും ചെയ്​തു. എന്നാൽ, സംശയം തോന്നി പൊലീസ്​ നടത്തിയ ചോദ്യം ചെയ്യലിലാണ്​ സംഭവത്തിന്‍റെ ചുരുളഴിയുന്നത്​. തിങ്കളാഴ്ച കുറ്റംസമ്മതിച്ച പെണ്‍കുട്ടിയെ കോടതിയില്‍ ഹാജരാക്കി ചൊവ്വാഴ്ച ജുവനൈല്‍ ഹോമിലേക്ക് മാറ്റി.

മാതാപിതാക്കള്‍ വീട്ടില്‍ ഇല്ലാത്ത സമയത്ത് പെണ്‍കുട്ടി ആൺസുഹൃത്തുമായി മണിക്കൂറുകളോളം മൊബൈല്‍ ഫോണില്‍ സംസാരിക്കുന്നതും ചാറ്റ് ചെയ്യുന്നതും പതിവായിരുന്നെന്ന്​ ​െപാലീസ്​ പറയുന്നു. ഏതാനും ദിവസം മുമ്പ് ഇക്കാര്യം സഹോദരന്‍ മാതാപിതാക്കളെ അറിയിച്ചു. തുടര്‍ന്ന് മാതാപിതാക്കള്‍ പെണ്‍കുട്ടിയെ വഴക്ക് പറയുകയും ഇതിൽനിന്ന്​ വിലക്കുകയും ചെയ്​തിരുന്നു. കഴിഞ്ഞ വ്യാഴാഴ്ച മാതാപിതാക്കള്‍ വീട്ടില്‍ ഇല്ലായിരുന്നപ്പോഴും പെണ്‍കുട്ടി ആൺസുഹൃത്തുമായി ഫോണില്‍ ഏറെ നേരം ചാറ്റ്​ ചെയ്​തു.

ഇത് സഹോദരൻ ചോദ്യം ചെയ്യുകയും ഇക്കാര്യം മാതാപിതാക്കളെ അറിയിക്കുമെന്ന് പറയുകയും ചെയ്തു. ഇതോടെ ഇരുവരും തമ്മില്‍ വഴക്കായി. അതിനിടെ, പെണ്‍കുട്ടി ഇയര്‍ഫോണ്‍ വയര്‍ സഹോദരന്‍റെ കഴുത്തില്‍ കുരുക്കി കൊലപ്പെടുത്തുകയുമായിരുന്നുവെന്ന്​ റായ്​ബറേലി പൊലീസ്​ സൂപ്രണ്ട്​ ശ്ലോക്​ കുമാർ പറഞ്ഞു.

മാതാപിതാക്കൾ വീട്ടിൽ തിരിച്ചെത്തിയപ്പോൾ മകനെ കാണാനില്ലെന്ന്​ കണ്ട്​ ഡൽമൗ പൊലീസിൽ പരാതി നൽകി. പൊലീസ്​ ഒമ്പതു വയസ്സുകാരനുവേണ്ടി അന്വേഷണം ശക്​തമാക്കുന്നതിനിടെയാണ്​ പിറ്റേ ദിവസം വീട്ടിലെ സ്​റ്റോർ റൂമിൽ നിന്ന്​ മൃതദേഹം ക​ണ്ടെത്തുന്നത്​. സ്റ്റോർ റൂമിൽ നിന്ന്​ ദുർഗന്ധം വമിക്കുന്നത്​ ശ്രദ്ധയിൽപ്പെട്ട മാതാപിതാക്കൾ നടത്തിയ പരിശോധനയിലാണ്​ മൃതദേഹം കിട്ടിയത്​.

തുടർന്ന്​ അവർ അയൽക്കാരനെതിരെ പരാതി നൽകുകയും പൊലീസ്​ അയാളെ കസ്റ്റഡിയിലെടുക്കുകയും ചെയ്​തു. ചോദ്യം ചെയ്യലിൽ കൊലപാതകം നടന്ന സമയത്ത്​ അയാൾ സ്​ഥലത്തില്ലായിരുന്നു എന്ന്​ മനസ്സിലാക്കിയതിനെ തുടർന്ന്​ അന്വേഷണം ആ സമയത്ത്​ അവിടെയുണ്ടായിരുന്നവരിലേക്കും കുടുംബാംഗങ്ങളിലേക്കും നീളുകയായിരുന്നു.

ബാലന്‍റെ മൃതദേഹത്തില്‍ ചെറിയ മുറിവുകളും പോറലുകളും ഉണ്ടായിരുന്നതാണ്​ പൊലീസിന്‍റെ സംശയം വര്‍ധിപ്പിച്ചത്​. തര്‍ക്കം നടന്നിട്ടുണ്ടെന്ന്​ ഉറപ്പായതിനെ തുടർന്ന്​ കുടുംബാംഗങ്ങളെ വിശദമായി ചോദ്യംചെയ്​തു. 25ലധികം പേരെ വൈദ്യപരിശോധനയ്ക്ക് വിധേയമാക്കി. അപ്പോളാണ്​ സഹോദരിയുടെ കഴുത്തിലും വയറ്റിലും കൈകളിലുമായി ചെറിയ മുറിവുകളും പാടകളും ക​​ണ്ടെത്തിയത്​.

തുടര്‍ന്ന് മാതാപിതാക്കളുടെയും ചൈല്‍ഡ് വെല്‍ഫയര്‍ ഓഫിസറുടെയും സാന്നിധ്യത്തില്‍ നടന്ന ചോദ്യംചെയ്യലിൽ 15കാരി കുറ്റം സമ്മതിച്ചു. സഹോദരനെ കൊല്ലാന്‍ ഉദ്ദേശ്യമില്ലായിരുന്നെന്നും ആണ്‍സുഹൃത്തുമായി ചാറ്റ്​ ചെയ്യുന്നതിനെ കുറിച്ച്​ മാതാപിതാക്കളോട് നിരന്തരം പരാതി പറയുന്നതിനാൽ പേടിപ്പിക്കുകയായിരുന്നു ലക്ഷ്യമെന്നും പെണ്‍കുട്ടി പൊലീസിന് മൊഴി നല്‍കിയതായി റായ്​ബറേലി പൊലീസ്​ സൂപ്രണ്ട്​ ശ്ലോക്​ കുമാർ പറഞ്ഞു.