നാഗ്​പുരിൽ 15കാരൻ അമ്മയുടെ കാമുകനെ തട്ടിക്കൊണ്ടുപോയി; സുഹൃത്തുക്കൾക്കൊപ്പം പൊലീസ്​ വലയിൽ

നാഗ്​പുർ: അമ്മയുടെ കാമുകനെ തട്ടിക്കൊണ്ടുപോയ 15കാരനും രണ്ട്​ സുഹൃത്തുക്കളും നാഗ്​പുരിൽ പൊലീസ്​ പിടിയില്‍. നാഗ്പുരില്‍ താമസിക്കുന്ന 15കാരനും ഇയാളുടെ സുഹൃത്തുക്കളായ സുരേഷ് കോരാഡ്ക്കര്‍ (19), മറ്റൊരു 17കാരന്‍ എന്നിവരുമാണ്​ പൊലീസിന്‍റെ വലയിലായത്​. 15കാരന്‍റെ അമ്മയുടെ കാമുകനായ പ്രദീപ് നന്ദന്‍വാര്‍ എന്നയാളെയാണ് മൂവരും ചേര്‍ന്ന് ബൈക്കില്‍ തട്ടിക്കൊണ്ടുപോകാന്‍ ശ്രമിച്ചത്.

15കാരന്‍റെ അമ്മ കൻസി ഹൗസ്​ ഛൗക്കിൽ തനിച്ചാണ്​ താമസിക്കുന്നത്​. ഇവരും പ്രദീപും തമ്മിലുള്ള അടുപ്പം മൂലം വീട്ടിൽ എന്നും കലഹമായിരുന്നു. പ്രദീപുമായുള്ള അമ്മയുടെ ബന്ധത്തെച്ചൊല്ലി കുടുംബപ്രശ്‌നങ്ങളുണ്ടായതിനെ തുടർന്ന്​ അമ്മയുടെ കാമുകനെ ഒരു പാഠം പഠിപ്പിക്കാനായിരുന്നു 15കാരന്‍റെ ശ്രമമെന്ന്​ പൊലീസ്​ പറഞ്ഞു. ഇതിനായി സഹോദരിയുടെ സുഹൃത്തായ സുരേഷിനെയും മറ്റൊരു സുഹൃത്തായ 17കാരനെയും ഒപ്പം കൂട്ടുകയായിരുന്നു. ജഗ്​നാഥ് ബുധ്​വാരിയിലെ പ്രദീപിന്‍റെ ജോലിസ്ഥലത്തെത്തിയാണ്​ മൂവര്‍സംഘം ഇയാളെ ബലമായി ബൈക്കില്‍ കയറ്റിക്കൊണ്ടുപോയത്​. എന്നാല്‍ യാത്രയ്ക്കിടെ ഇത്​വാരിയിലെത്തിയപ്പോൾ പൊലീസ് പട്രോളിങ് വാഹനം കണ്ടതോടെ പ്രദീപ് ഓടുന്ന ബൈക്കില്‍നിന്ന് ചാടി. ഇതോടെ 15കാരനും കൂട്ടുകാരും മറ്റൊരു വഴിയിലൂടെ രക്ഷപ്പെട്ടു.

സംഭവത്തിന് പിന്നാലെ 15കാരന്‍റെ അമ്മയോടും തന്‍റെ ബന്ധുക്കളോടും പ്രദീപ് സംഭവത്തെ കുറിച്ച് പറഞ്ഞു. പ്രദീപിന്‍റെ തൊഴിലുടമ നൽകിയ വിവരങ്ങൾ അനുസരിച്ച്​ നടത്തിയ അന്വേഷണത്തിൽ പൊലീസ്​ മൂന്നംഗ സംഘത്തെ പിടികൂടി. മൂന്നുപേര്‍ക്കും മറ്റ് ക്രിമിനല്‍ പശ്ചാത്തലമില്ലെന്ന്​ വ്യക്​തമാക്കിയ പൊലീസ്​, സംഭവത്തില്‍ നിയമപരമായ നടപടി സ്വീകരിക്കുമെന്നും പറഞ്ഞു.