You are here

കുളുവിൽ ബസ്​ നദിയിൽ വീണ്​ മരിച്ചവരുടെ എണ്ണം 44 ആയി

06:45 AM
21/06/2019

മണാലി: ഹിമാചൽപ്രദേശിലെ കുളു ജില്ലയിൽ സ്വകാര്യ ബസ്​ 500 അടി താഴ്​ചയുള്ള മലയിടുക്കിലേക്ക്​​ മറിഞ്ഞ്​ മരിച്ചവരുടെ എണ്ണം 44 ആയി. മുപ്പതോളം പേർക്ക്​ പരിക്കേറ്റു. പരിക്കേറ്റ പലരുടെയും നില ഗുരുതരമായി തുടരുകയാണ്. സംഭവത്തിൽ അന്വേഷണത്തിന് ഉത്തരവിട്ടതായി പ്രധാനമന്ത്രി നരേന്ദ്ര മോദി അറിയിച്ചു.

ബഞ്ചാർ സബ്​ഡിവിഷനിൽ വ്യാഴാഴ്​ച വൈകുന്നേരം നാലിനായിരുന്നു​ അപകടം. മലയിടുക്കിന്​ താഴെ അരുവിയിലേക്ക്​ പതിച്ച ബസിൽ കുടുങ്ങിയ നിലയിലായിരുന്നു യാത്രക്കാരിൽ പലരും. പ്രദേശവാസികളും പൊലീസും ചേർന്നാണ്​ രക്ഷാപ്രവർത്തനം നടത്തിയത്​. ആംബുലൻസുകളിലും പ്രാദേശവാസികളുടെ വാഹനങ്ങളിലുമാണ്​ പലരെയും ആശുപത്രിയിൽ എത്തിച്ചത്​.

പരിക്കേറ്റവരിൽ ഭൂരിപക്ഷംപേരുടെയും അവസ്​ഥ അതിഗുരുതരമാണെന്ന്​ കുളു പൊലീസ്​ സൂപ്രണ്ട്​ ശാലിനി അഗ്​നിഹോത്രി പറഞ്ഞു. 12 സ്​ത്രീകളെയും 10 കുട്ടികളെയും 10 പുരുഷന്മാരെയും രക്ഷിക്കാൻ കഴിഞ്ഞുവെന്നും അവർ അറിയിച്ചു.

കുളു-ഗദഗുഷൈനി റൂട്ടിൽ പതിവായി സർവിസ്​ നടത്തുന്ന ബസാണ്​ അപകടത്തിൽപ്പെട്ടത്​. ഇതിൽ നിറയെ യാത്രക്കാരുണ്ടായിരുന്നു. ബഞ്ചാർ ബസ്​സ്​റ്റാൻഡിൽനിന്ന്​ രണ്ട്​ കി.മീറ്റർ ദൂരം പിന്നിട്ടപ്പോഴാണ്​ അപകടം. ഭിയോത്ത്​ ഭാഗത്തെ കൊടുംവളവ്​ തിരിയുന്നതിനിടെ​ നിയന്ത്രണംവിട്ട്​ ബസ്​ മലയടിവാരത്തിലേക്ക്​ മറിയുകയായിരുന്നു.


 

Loading...
COMMENTS