വീടണയാൻ 14 കി.മീ മാത്രം; 150 കിലോമീറ്ററോളം നടന്ന 12കാരിക്ക്​ ദാരുണാന്ത്യം

ബിജാപൂർ: ലോക്​ഡൗണിനെ തുടർന്ന്​ വീട്ടിലെത്താൻ 150ഓളം കിലോമീറ്റർ നടന്ന 12 കാരിക്ക് ​ ദാരുണാന്ത്യം. തെലങ്കാനയിൽ നിന്നും ഛത്തീസ്​ഗ​ഢിലെ ബിജാപൂർ ഗ്രാമ​ത്തിലേക്കാണ്​ ലോക്​ഡൗണിനെ തുടർന്ന്​ കുട്ടിയും മറ്റുള്ളവരും നടന്നത്​. വീടണയാൻ 14 കിലോമീറ്റർ മാത്രം ബാക്കിയുള്ളപ്പോഴാണ് ജ​മ​്​ലോ മഗ്​ദം എന്ന 12 കാരി മരിച്ചുവീണത്​.

രണ്ടു മാസമായി തെലങ്കാനയിലെ മുളകുപാടത്താണ്​ പെൺകുട്ടി ​േജാലി ചെയ്യുന്നത്​. കൂടെ ജോലിചെയ്യുന്ന മറ്റു 11പേരോടൊപ്പം ഏപ്രിൽ 15നാണ്​ കുട്ടി ഗ്രാമത്തിലേക്ക്​ യാത്ര തിരിച്ചത്​. മൂന്നുദിവസം ദേശീയ പാത ഒഴിവാക്കി കാട്ടിലൂടെയായിരുന്നു യാത്ര. വീട്ടി​േലക്കെത്താൻ 14 കി​േലാമീറ്റർ ബാക്കിയുള്ളപ്പോൾ ശനിയാഴ്​ച ഉച്ചയോടെ വയർ വേദനയും ഛർദ്ദിയും തുടങ്ങി. പിന്നീട്​​ മരണം സ്​ഥിരീകരിച്ചു.

ശേഷം ആംബുലൻസി​ൽ കുട്ടിയുടെ മൃതദേഹം വീട്ടിലെത്തിച്ചു. കുട്ടിക്ക്​ നിർജലീകരണവും പോഷകാഹാര കുറവും ഉണ്ടായിരുന്നതായി ​ഡോക്​ടർമാർ അറിയിച്ചു. കുട്ടിക്ക്​ കോവിഡ്​ ബാധിച്ചിട്ടില്ലെന്ന്​ സ്​ഥിരീകരിച്ചിട്ടുണ്ട്​​.

കുട്ടിയുടെ കുടുംബത്തിന്​ ഒരു ലക്ഷം രൂപ നഷ്​ടപരിഹാരം പ്രഖ്യാപിച്ചു. ജോലിയോ താമസ സ്​ഥലമോ ഇല്ലാത്തതിനാൽ ആയിരക്കണക്കിന്​ കുടിയേറ്റ തൊഴിലാളികളാണ്​ സ്വന്തം ഗ്രാമങ്ങളിലേക്ക്​ പലായനം ചെയ്യുന്നത്​.