പാകിസ്​താനിൽ നിന്ന്​ കുടിയേറിയ ഹിന്ദു കുടുംബത്തിലെ 11പേർ മരിച്ച നിലയിൽ

ജോധ്​പൂർ: പാകിസ്​താനിൽ നിന്നും കുടിയേറിയ ഹൈന്ദവ കുടുംബത്തിലെ 11അംഗങ്ങളെ മരിച്ച നിലയിൽ കണ്ടെത്തി. ജോധ്​പൂർ ജില്ലയിലെ ഡെച്ചു പ്രദേശത്തെ ലോഡ്​ത ഗ്രാമത്തിൽ ഞായറാഴ്​ച പുലർചെയാണ്​ സംഭവം. കുടുംബാംഗങ്ങളിലൊരാൾ ജീവനോടെയുണ്ടെന്ന്​ പൊലീസ്​ ഉദ്യോഗസ്​ഥർ വ്യക്തമാക്കി.

'കഴിഞ്ഞദിവസം രാത്രി നടന്നെന്ന്​ കരുതപ്പെടുന്ന സംഭവത്തെക്കുറിച്ച് അറിയി​ല്ലെന്നാണ്​ ഇയാൾ പറയുന്നത്'- റൂറൽ പൊലീസ്​ സൂപ്രണ്ട്​ രാഹുൽ ബർഹത്​ പറഞ്ഞു.

മരണ കാരണം വ്യക്​തമല്ലെങ്കിലും കുടുംബാംഗങ്ങൾ രാസവസ്​തു കഴിച്ച്​ ജീവനൊടുക്കുകയായിരുന്നുവെന്നാണ് പൊലീസി​െൻറ പ്രാഥമിക നിഗമനം. കുടിലി​െൻറ പരിസരത്ത്​ നിന്നും രാസവസ്​തുവി​െൻറ ഗന്ധം ഉയർന്നത്​ ചുണ്ടിക്കാട്ടിയാണിത്​.

ഭിൽ സമുദായത്തിൽ പെട്ട കുടുംബം പാകിസ്​താനിൽ നിന്നും കുടിയേറി സ്​ഥലം പാട്ടത്തിനെടുത്ത്​ കൃഷി ചെയ്​ത്​ വരികയായിരുന്നു.

'മൃതദേഹങ്ങളിൽ പരിക്കേറ്റ പാടുകളോ അസ്വാഭാവികതയോ കാണാൻ സാധിച്ചിട്ടുമില്ല. ഫോറൻസിക്​ ടീമും ഡോഗ്​ സ്​ക്വാഡും സ്​ഥല​ത്തെത്തിയ ശേഷമാകും ഇക്കാര്യത്തിൽ തീർപ്പ്​ കൽപിക്കുക' എസ്​.പി കൂട്ടിച്ചേർത്തു.