തിരുപ്പതി സർക്കാർ ആശുപത്രിയിൽ ഓക്സിജൻ കിട്ടാതെ 11 കോവിഡ് രോഗികൾ മരിച്ചു

തിരുപ്പതി: ആന്ധപ്രദേശിലെ തിരുപ്പതി സർക്കാർ ആശുപത്രിയിൽ ഓക്സിജൻ കിട്ടാതെ 11 കോവിഡ് രോഗികൾ മരിച്ചു. തിങ്കളാഴ്ച വൈകീട്ടാണ് സംഭവമുണ്ടായത്. ആശുപത്രിയിലേക്കുളള മെഡിക്കൽ ഓക്സിജൻ വിതരണം നിന്നുപോയതാണ് മരണകാരണം.

ഐ.സി.യുവിൽ പ്രവേശിപ്പിച്ചിരുന്ന രോ​ഗികളാണ് മരിച്ചത്. 25 മുതൽ 45 മിനിറ്റ് വരെ ഓക്സിജൻ വിതരണം തടസ്സപ്പെട്ടുവെന്ന് ബന്ധുക്കൾ ആരോപിച്ചു. എന്നാൽ അഞ്ച് മിനിറ്റ് മാത്രമാണ് ഓക്സിജൻ തടസ്സപ്പെട്ടതെന്നാണ് ചിറ്റൂർ കലക്ടർ നൽകുന്ന വിശദീകരണം.

'അഞ്ച് മിനിറ്റുകൾക്കകം ഓക്സിജൻ വിതരണം പുന:സ്ഥാപിച്ചു. ആരോഗ്യപ്രവർത്തകരുടെ സമയോചിതമായ ഇടപെടൽ മൂലം വലിയൊരു ദുരന്തം ഒഴിവാക്കാനായി. ഇല്ലെങ്കിൽ മരണനിരക്ക് ഇനിയും കൂടിയേനെ. തമിഴ്നാട്ടിലെ ശ്രീപെരുപുതൂരിൽ നിന്ന് എത്തേണ്ടിയിരുന്ന ഓക്സിജൻ സിലിണ്ടറുകൾ വൈകിയതാണ് ദുരന്തത്തിന് കാരണം' കലക്ടർ പറഞ്ഞു.

ദുരന്തത്തിൽ മുഖ്യമന്ത്രി വൈ എസ് ജ​ഗൻമോഹൻ റെഡ്ഡി അനുശോചനം രേഖപ്പെടുത്തി. സംഭവത്തെക്കുറിച്ച് അന്വേഷണം നടത്തി അടിയന്തിരമായി റിപ്പോർട്ട് സമർപ്പിക്കാനും ഉത്തരവിട്ടുണ്ട്.