മധ്യപ്രദേശ്​ കിണർ ദുരന്തം; മരിച്ചവരുടെ എണ്ണം 11 ആയി, 19 ​േപരെ രക്ഷപ്പെടുത്തി

ഭോപാൽ: മധ്യപ്ര​േദശിലെ വിദിഷ ജില്ലയിൽ ബാലികയെ രക്ഷിക്കാൻ ശ്രമിക്കുന്നതിനിടെയുണ്ടായ അപകടത്തിൽ മരിച്ചവരുടെ എണ്ണം 11 ആയി. ബാലികയെ രക്ഷിക്കാൻ ശ്രമിക്കാൻ ഒരുമിച്ച്​ കൂടിയ ജനങ്ങളുടെ ഭാരം താങ്ങാൻ കഴിയാതെ കിണറിന്‍റെ മുൻഭാഗം തകർന്ന്​ 30 പേർ കിണറ്റിൽ വീഴുകയായിരുന്നു.

ജില്ല ആസ്​ഥാനത്ത്​ നിന്ന്​ 50 കിലോമീറ്റർ അകലെ ഗഞ്ച്​ ബസോദയിൽ വ്യാഴാഴ്ചയാണ്​ സംഭവം. 50 അടിയോളം താഴ്ചയുള്ളതാണ്​ കിണർ. ഇതിന്‍റെ ജലനിരപ്പ്​ 20 അടിയോളം വരുമെന്ന്​ ഗ്രാമവാസികൾ പറയുന്നു.

ദുരന്തത്തിൽ അകപ്പെട്ട 19 പേരെ രക്ഷപ്പെടുത്തി. 11 പേരുടെ മൃതദേഹവും കണ്ടെടുത്തു. കിണറ്റിൽ അവശിഷ്​ടങ്ങൾക്കിടയിൽ മറ്റാരും കുടുങ്ങികിടക്കാൻ സാധ്യതയില്ലെന്ന്​ ഭരണകൂടം അറിയിച്ചു. എന്നാൽ കിണറിലെ അവശിഷ്​ടങ്ങൾ മുഴുവൻ മാറ്റി വെള്ളം മുഴുവൻ വറ്റിച്ചാൽ മാത്രമേ രക്ഷാപ്രവർത്തനം നിർ​ത്തിവെക്കുവെന്നും അവർ കൂട്ടിച്ചേർത്തു.

ദുരന്തവാർത്ത അറിഞ്ഞ്​ മന്ത്രിമാരായ വിശ്വാസ്​ സാരംഗ്​, ഗോവിന്ദ്​ സിങ്​ രജ്​പുത്​ തുടങ്ങിയവർ സ്​ഥലത്തെത്തിയിരുന്നു.

വ്യാഴാഴ്​ച വൈകിട്ട്​ ആറുമണിയോടെയാണ്​ കുട്ടി കിണറ്റിൽ വീണത്​. കുട്ടിയെ രക്ഷിക്കാനായി ചിലർ കിണറ്റിൽ ഇറങ്ങുകയും ചിലർ മുകളിൽ നിൽക്കുകയും ചെയ്​തു. കിണറിന്‍റെ ചുറ്റുമതിൽ തകർന്ന്​ ചുറ്റുംകൂടി നിന്നവർ കിണറ്റിലേക്ക്​ വീഴുകയായിരുന്നു. രാത്രി 11 മണിക്ക്​ രക്ഷാപ്രവർത്തനം പുരോഗമിക്കുന്നതിനിടെ ട്രാക്​ടർ തെന്നിമാറിയതോടെ നാലു​പൊലീസുകാർ കൂടി കിണറ്റിലേക്ക്​ വീണതായി സാക്ഷികൾ പറയുന്നു. മതിലിന്‍റെ അവശിഷ്​ടങ്ങൾക്കിടയിൽപ്പെട്ടാണ്​ കൂടുതൽ മരണ​െമന്ന്​ ഭരണകൂടം അറിയിച്ചു.

രക്ഷാപ്രവർത്തനം പുരോഗമിക്കുകയാണെന്നും ഉദ്യോഗസ്​ഥരുമായി ബന്ധപ്പെടുന്നു​ണ്ടെന്നും മുഖ്യമന്ത്രി ശിവരാജ്​ സിങ്​ ചൗഹാൻ അറിയിച്ചിരുന്നു. ഉന്നതതല അന്വേഷണത്തിന്​ ഉത്തരവിട്ട മുഖ്യമന്ത്രി അപകടത്തിൽ പെട്ടവർക്ക്​ ഏറ്റവും മികച്ച ചികിത്സ നൽകാനും നിർദേശം നൽകി.