ബി.ജെ.പി നേതാവിന്‍റെ കാർ ആക്രമിച്ചുവെന്ന്​ ആരോപിച്ച്​ 100 കർഷകർക്കെതിരെ രാജ്യദ്രോഹ കേസ്​

ഛണ്ഡിഗഢ്​: ബി.ജെ.പി നേതാവും ഹരിയാന ഡെപ്യൂട്ടി സ്​പീക്കറുമായ രൺബീർ ഗാങ്​വായുടെ കാർ ആക്രമിച്ചുവെന്ന്​ ആരോപിച്ച്​ 100 കർഷകർക്കെതിരെ രാജ്യദ്രോഹ കേസ്​. ഹരിയാനയിൽ ഭരണം നടത്തുന്ന ബി.ജെ.പി-ജനനായക്​ ജനത പാർട്ടി സഖ്യ സർക്കാറിനെതിരെ കർഷകർ പ്ര​തിഷേധത്തിലാണ്​. പുതിയ കാർഷിക നിയമങ്ങൾക്കെതിരെയാണ്​ പ്രതിഷേധം.

ഹരിയാനയിലെ സിർസ ജില്ലയിൽ ജൂലൈ 11നാണ്​ സംഭവമുണ്ടായത്​. അന്ന്​ തന്നെ എഫ്​.ഐ.ആർ രജിസ്റ്റർ ചെയ്യുകയായിരുന്നു. രാജ്യദ്രോഹ കുറ്റത്തിന്​ പുറമേ കൊലപാതക ശ്രമവും കർഷകർക്കെതിരെ ചുമത്തിയിട്ടുണ്ട്​. കർഷക സമരത്തിന്‍റെ നേതാക്കളായ ഹരിചരൺ സിങ്​, പ്രഹ്ലാദ്​ സിങ്​ എന്നിവരും കേസിൽ പ്രതികളാണ്​.

രാജ്യ​ദ്രോഹ കുറ്റം ചുമത്തിയതിനെതിരെ സംയുക്​ത കിസാൻ മോർച്ച രംഗത്തെത്തി. ​കർഷകർക്കെതിരായ ആരോപണങ്ങൾ കെട്ടിച്ചമച്ചതാണെന്ന്​ കിസാൻ മോർച്ച വ്യക്​തമാക്കി. രാജ്യദ്രോഹകുറ്റം കൊളോണിയൽ കാലത്തെ നിയമമാണെന്നും ഇതിൽ പുനരാലോചന വേണമെന്നും സുപ്രീംകോടതി ഇന്ന്​ വ്യക്​തമാക്കിയിരുന്നു.