മധ്യപ്രദേശിൽ 10 കോവിഡ്​ രോഗികൾ ഓക്​സിജൻ കിട്ടാതെ മരിച്ചെന്ന്​ ബന്ധുക്കൾ; നിഷേധിച്ച്​ ആശുപത്രി അധികൃതർ

ഭോപാൽ: മധ്യപ്രദേശിലെ ശഹദോൽ ജില്ലയിലെ സർക്കാർ മെഡിക്കൽ കോളജിൽ 10 കോവിഡ്​ രോഗികൾ ഓക്​സിജൻ ദൗർലഭ്യം മൂലം മരിച്ചെന്ന്​ ആരോപണം. അതേസമയം, ജില്ലാ ഭരണകൂടവും ആശുപത്രി അധികൃതരും ഇക്കാര്യം നിഷേധിച്ചു. 'ഇന്നലെ ആറ്​ മരണമാണ്​ ഐ.സി.യുവിൽ സംഭവിച്ചത്​. അവയുടെ കാരണം ഒാക്​സിജൻ ദൗർലഭ്യമല്ല. ഐ.സി.യുവിൽ 62 രോഗികളാണുള്ളത്​. ഹോസ്​പിറ്റലിൽ 255 കോവിഡ്​ രോഗികളുണ്ട്​. ഇതിൽ 155 പേർക്ക് ഓക്​സിജൻ ലഭ്യമാക്കുന്നുണ്ട്​' -മെഡിക്കൽ കോളജ്​ ഹോസ്​പിറ്റൽ ഡീൻ ഡോ. മിലിന്ദ്​ ശിരാൽകർ പറഞ്ഞു.

ഓക്​സിജൻ ലഭിക്കാത്തതിനെ തുടർന്നല്ല മരണങ്ങൾ സംഭവിച്ചതെന്ന്​ ജില്ലാ കലക്​ടർ സ​േത്യ​ന്ദ്ര സിങ്​ വ്യക്​തമാക്കി. 'ജംബോ സിലിണ്ടറുകളുടെ സേവനം എ​േപ്പാഴും മെഡിക്കൽ കോളജിൽ ലഭ്യമാണെന്ന്​ ഉറപ്പുവരുത്തിയിട്ടുണ്ട്​' -അദ്ദേഹം പറഞ്ഞു. ഓക്​സിജൻ ലഭിക്കാത്തത്​ മൂലം രോഗികൾ മരിച്ചെന്ന പ്രചാരണം തെറ്റാണെന്ന്​ മെഡിക്കൽ വിദ്യാഭ്യാസ മന്ത്രി വിശ്വാസ്​ കൈലാസ്​ സാരംഗ്​ പറഞ്ഞു. സംസ്​ഥാനത്ത്​ ആവശ്യത്തിന്​ ഓക്​സിജൻ ലഭ്യമാണെന്ന്​ മുഖ്യമന്ത്രി ശിവരാജ്​ സിങ്​ ചൗഹാൻ കഴിഞ്ഞ ദിവസം പറഞ്ഞിരുന്നു. 335 ​െമട്രിക്​ ടൺ ഓക്​സിജൻ ആണ്​ ആവശ്യമെന്നും 350​ മെട്രിക്​ ടൺ സംസ്​ഥാനത്ത്​ ഉണ്ടെന്നും അദ്ദേഹം വ്യക്​തമാക്കി.

അതേസമയം, ആശുപത്രി അധികൃതരുടെയും ജീവനക്കാരുടെയും വീഴ്ച മൂലമാണ്​ മരണങ്ങൾ സംഭവിച്ചതെന്ന്​ മരിച്ചവരുടെ ബന്ധുക്കൾ ആരോപിക്കുന്നു. 'രാവിലെ ആറ്​ മണിക്കാണ്​ എന്‍റെ ബന്ധു മരിച്ചതായി അറിയിക്കുന്നത്​. ഐ.സി.യുവിലുള്ള രോഗികൾക്ക്​ രാത്രി ബന്ധുക്കൾ ഭക്ഷണം നൽകി മടങ്ങിയതാണ്​. പി​ന്നെ കേൾക്കുന്നത്​ മരണവാർത്തയും. ആദ്യം ഐ.സി.യുവിൽ കയറി കാണാൻ ഞങ്ങളെ അനുവദിച്ചില്ല. പിന്നെ ബഹളമുണ്ടാക്കി കയറിയപ്പോൾ പത്തോളം പേർ മരിച്ചതായി കണ്ടു. മൃതദേഹങ്ങൾ തണുത്ത്​ മരവിച്ചിരുന്നു. ഓക്​സിജൻ വിതരണം നിലച്ചതായി ആശുപത്രിയിലെ ഗാർഡുമാരാണ്​ ഞങ്ങളോട്​ പറയുന്നത്​' -മരിച്ചവരിലൊരാളുടെ ബന്ധു പറഞ്ഞു.

അതിനിടെ, ആറുപേർ മാത്രമേ മരിച്ചുള്ളു​െയന്ന ആശുപത്രി അധികൃതരുടെ വാദത്തെ വിമർശിച്ച്​ കോൺഗ്രസ്​ നേതാവ്​ വിവേക്​ തൻഖ രംഗത്തെത്തി. 'ചിലർ പറയുന്നു മരിച്ചത്​ ആറുപേർ ​ എന്ന്​, ചിലർ 16 എന്ന്​. കണക്കുകൾ എന്തുമാക​ട്ടെ, നഷ്​ടപ്പെടുന്ന ഒരോ ജീവനും വിലപ്പെട്ടതാണ്​. അധികൃതരുടെ അനാസ്​ഥയാണ്​ ഇപ്പോൾ വെളിച്ചത്തുവന്നിരിക്കുന്നത്​' -അദ്ദേഹം പറഞ്ഞു.