You are here

ഇത്​ മാനുഷിക ദുരന്തം; വർഗീയവത്​കരിക്കരുത്​ -സി.പി.ഐ

23:22 PM
01/04/2020

ന്യൂഡൽഹി: ലോക്​ഡൗൺ പ്രഖ്യാപിക്കുന്നതിന്​ മുമ്പ്​ നടന്ന തബ്​ലീഗ്​ ജമാഅത്ത്​ സമ്മേളനത്തെ പഴിചാരി കൊറോണവ്യാപനത്തെ വർഗീയവത്​കരിക്കുന്ന ​ബി.ജെ.പി നിലപാടിനെതിരെ സി.പി.ഐ. കൊറോണ വൈറസിനെതിരായ പോരാട്ടം പോലും ഹിന്ദു-മുസ്‌ലിം പ്രശ്‌നമാക്കി മാറ്റാനുള്ള ശ്രമം നടക്കുന്നതായി സി.പി.ഐ ദേശീയ ജനറൽ സെക്രട്ടറി ഡി. രാജ പറഞ്ഞു. 

രാമായണവും മഹാഭാരതവും പുന:സംപ്രേഷണം ചെയ്തുകൊണ്ടാണ് കൊറോണയുടെ വർഗീയ മുതലെടുപ്പ്​ തുടങ്ങിയത്. ഇപ്പോൾ വൈറസ് പടരുന്നതിന് ഒരു സമൂഹത്തെ ഒറ്റപ്പെടുത്തുന്നു. ആരോഗ്യ വിപത്തിനെ സാമുദായിക പ്രശ്‌നമായി ചുരുക്കരുത്. പരിശോധന സൗകര്യങ്ങൾ വർധിപ്പിക്കാനും വൈറസ്​ വ്യാപനം തടയാനുമാണ്​ സർക്കാർ ശ്രമിക്കേണ്ടത്​. ഇതൊരു മാനുഷിക ദുരന്തമാണ്, മതത്തെ തകർക്കാനുള്ള സമയമല്ല -അദ്ദേഹം പറഞ്ഞു.

ഹിന്ദു-മുസ്‌ലിം ഭിന്നിപ്പുണ്ടാക്കി ജനങ്ങളുടെ ശ്രദ്ധ വ്യതിചലിപ്പിക്കാൻ സർക്കാർ ശ്രമിക്കുകയാണെന്ന് സി.പി.ഐ (എം.എൽ) പറഞ്ഞു. വിദേശ സന്ദർശകരെ വിലക്കാനുള്ള അധികാരവും ഉത്തരവാദിത്തവും നിറവേറ്റുന്നതിൽ കേന്ദ്ര സർക്കാർ പരാജയപ്പെട്ടു. ജനക്കൂട്ടത്തെ നിയന്ത്രിക്കുന്നതിനുപകരം, യു.എസ് പ്രസിഡന്റ് ഡോണൾഡ് ട്രംപി​​െൻറ സന്ദർശനം പ്രോത്സാഹിപ്പിക്കുന്ന തിരക്കിലായിരുന്നു ബി.ജെ.പി. ഫെബ്രുവരി ആദ്യം പ്രതിപക്ഷ നേതാക്കൾ നൽകിയ മുന്നറിയിപ്പുകൾ അവഗണിച്ചതായും സി.പി.ഐ(എം.എൽ) പ്രസ്​താവനയിൽ ആരോപിച്ചു.

Loading...
COMMENTS