You are here
സർക്കാറിലുള്ള വിശ്വാസം നഷ്ടപ്പെട്ടു; ചെന്നൈ ടെക്കിയുടെ മരണത്തിൽ ഹൈകോടതി
ചെന്നൈ: എ.ഐ.എ.ഡി.എം.കെയുടെ ഹോൾഡിങ് വീണുണ്ടായ അപകടത്തിൽ ചെന്നൈയിൽ യുവതി മരിച്ച സംഭവത്തിൽ തമിഴ്നാട് സർക്കാറിനെ രൂക്ഷമായി വിമർശിച്ച് ഹൈകോടതി. 23കാരിയായ ശുഭശ്രീയുടെ മരണം ബ്യൂറോക്രസിയുടെ നിസംഗതമൂലമാണെന്ന് ഹൈകോടതി വിമർശിച്ചു.
ജനങ്ങളുടെ ജീവന് ഇവിടെ ഒരു വിലയുമില്ല. ഇത് ബ്യൂറോക്രസിയുടെ നിസംഗതയാണ്. സർക്കാറിലുള്ള വിശ്വാസം നഷ്ടപ്പെട്ടുവെന്ന് ശുഭശ്രീയുടെ മരണം ചൂണ്ടിക്കാട്ടി ഹൈകോടതി ജസ്റ്റിസ് ഷെഹസായി പറഞ്ഞു. അനധികൃത ഫ്ലെക്സുകൾക്കും ഹോൾഡിങ്ങുകൾക്കും എതിരെ നിരവധി ഉത്തരവുകൾ പുറപ്പെടുവിച്ചിട്ടുണ്ടെന്നും ഹൈകോടതി വ്യക്തമാക്കി.
അതേസമയം, ശുഭശ്രീയുടെ മരണത്തിന് ഉത്തരവാദി സംസ്ഥാന സർക്കാരാണെന്ന് ഡി.എം.കെ അധ്യക്ഷൻ എം.കെ സ്റ്റാലൻ ആരോപിച്ചു.എ.ഐ.ഡി.എം.കെ കൗൺസിലറിൻെ മകൻെറ കല്യാണത്തിനായി സ്ഥാപിച്ച ഹോൾഡിങ് സ്കൂട്ടറിൽ സഞ്ചരിക്കുകയായിരുന്ന ശുഭശ്രീയുടെ മേൽ പതിക്കുകയായിരുന്നു. സ്കൂട്ടറിൽ നിന്ന് താഴെ വീണ ശുഭശ്രീയുടെ മേൽ പിന്നാലെ എത്തിയ കുടിവെള്ള ടാങ്കർ കയറുകയും ചെയ്തിരുന്നു.
